کوئٹہ۔ 26اپریل (اے پی پی) وزیراعلیٰ بلوچستان جام کمال خان نا روچہ نا بننگ آ سوزی ، میوہ و ایلو کنوئی آ گڑاتا نرخ آتے ٹی ودکی نا نوٹس ئِ ہلسا پارے کہ روچہ نا بابرکت انگا تُو اٹی دوکاندار آتے من مانی کننگ کن الیپنہ۔ وزیراعلیٰ نا پارت آ پرائس کنٹرول کمیٹی تے فعال کرسا منافع خور، ذخیرہ اندوز و اوار سوار کروک آتون سختی اٹ مون تننگک۔ وزیراعلیٰ بلوچستان جام کمال خان کمشنر و ڈپٹی کمشنر آتے پارت کرے کہ ہراضلع غان گڑاتے کبین کننگ نا غاو ملے ہمو ضلع نا انتظامیہ نا برخلاف ہم کارروائی مریک۔ وزیراعلیٰ بلوچستان جام کمال خان نا وارننگ آ دوکاندار آک ہم روچہ نا شرف اٹی الس ئِ ریلیف تننگ کن مصنوعی کبینی آن پاناد کیر۔ وزیراعلیٰ بلوچستان جام کمال خان نا روچہ ٹی امن و رواداری ئِ برقرار تخنگ، نہادآتے ٹی سوگوی و روچہ نا شرف ئِ المی کننگ کن غٹ ڈویژنل کمشنر ، ڈپٹی کمشنر و آر پی او تا کانفرنس اس اڈتننگ نا پارت کرے ۔ بروک آ ہفتہ اڈ ہلوک آ کانفرنس نا کماشی ئِ وزیراعلیٰ بلوچستان جام کمال خان تینٹ کیک۔
