اسلام آباد۔ 26اپریل (اے پی پی) وزیر مملکت پارلیمانی امور علی محمد خان پارینے کہ روچہ نا نیام اسکان سعودی عرب آن 2100 آن زیات بندی تے یلہ کننگ نا گمان ئِ ، ایران تون ہم معمولی ڈوہ تیٹی اوار بندی تا وطن آ پدی بننگ نا گمان ئِ۔ جمعہ نادے آ قومی اسمبلی ٹی عالیہ کامران و ایلوفتا پیشن نا ملک جیل آتے ٹی بند بندی تا یلہ کننگ کن گام گیج کپننگ نا بابت چکاری نوٹس نا ورندی ٹی وزیر مملکت پارلیمانی امور علی محمد خان پارے کہ پیشن نا ملک آن بندی تے پدی اتنگ ، کزیت کروک آ بندغ آتا میت آتے وطن آ پدی اتنگ، مد آن زیات اڈ کروک آ بندغ آتا وطن آ پدی اتنگ ننا اولیت آتے ٹی ئِ۔ پیشن نا ملک رہینگوک بندی تا معاملہ اہم ئِ، ولے وزارت خارجہ امور و اوورسیز پاکستانیز اواری اٹ داڑاکاریم کننگ ئُ۔ سعودی ولی عہد نا دورہ پاکستان اٹی وزیراعظم عمران خان اوڑان سعودی عرب اٹی بند پاکستانی تا یلہ کننگ کن ہیت کریسس۔ داسہ خوشخبری دادے کہ 21سد آن زیات بندی روچہ نا نیام اسکان یلہ مریرہ۔ اوپارے کہ ایران تون ہم ہیت مسنے او ہم معمولی ڈوہ تیٹی اوار دزگیر بندی تے یلہ کیک۔ اوپارے کہ مچ آ دنیا ٹی 96لکھ پاکستانی ساڑی ئُ۔ اوفتیان دزگیر پاکستانی تیان گلف یا ایلو ملک آتے ٹی ساڑی بندی تا اسہ بھلو کچ اس بے کچ سنگین نوعیت نا ڈوہ تیٹی دزگیر ئُ۔ پیشن نا ملک پاکستانی بندی تے قونصل رسینگ تون اوار اوار اوفتا خاہوت تون ہم رابطہ تخنگ کن گام گیج کننگک۔ اوغانستان اٹی ہم معمولی ڈوہ تیٹی اوار بندغ آتا یلہ کننگ کن کوشست مننگ ئِ۔ اوپارے کہ وزارت اوورسیز پاکستانیز اٹی اسہ پورٹل اس جوڑ کننگانے۔ داکان ہرپیشن ملک اٹ رہینگوک آ پاکستانی تا بابت معلومداری ہلنگ مریک۔ اوپارے کہ اسہ بین الوزارتی کمیٹی اس ہم ساڑی ئِ ہرا دامعاملہ غا گام گیج چست کیک۔
