اسلام آباد۔ 26اپریل (اے پی پی) ڈیہہ نا شونداری و پائیدار امن نا اسیجاایجنڈا ئِ مون آ دننگ کن پاکستان و سعودی عرب اقتصادی کمکاری و ادار ہ جاتی رابطہ غاتے پین مون آ دننگ آ امنا کرسا دا عزم انا درشانی ئِ کرینو کہ واپار و زرکاری نا بشخ آتے ٹی ہڑتوم آ کنڈآتا تعلقداری تے پین سوگو کننگے۔ دا عزم انا درشانی ئِ سعودی عرب نا ڈل انا سروک و سعودی شوریٰ کونسل نا چیئرمین ڈاکٹر عبداللہ بن محمد بن ابراہیم الشیخ تینا مسہ دے ئی دورہ نا ایسری آ کرے۔ سعودی عرب نا ڈل جمعہ نادے آ وطن آ تینا پدی رادہ مس ۔ ڈل ئِ چیئرمین سینیٹ محمد صادق سنجرانی نیو انٹرنیشنل اسلام آباد ایئر پورٹ آن سپارا۔ داوخت آ سینیٹر مہمانداری سینیٹر دلاور خان وسینیٹر ڈاکٹر اسد اشرف، میر کبیر محمد شہی ، سسی پلیجو ، سیمی ایزدی و سینیٹ سیکرٹریٹ نا بڑزکو کمامدارآک ہم ساڑی ئسر۔ سعودی ڈل اتون گپ و تران کرسا چیئرمین سینیٹ پارے کہ دادورہ نا سوب اقتصادی ، راجی و سیاسی بشخ آتے ٹی تعلقداری تے پین ودفنگ کن کسر آک آوار مریرہ۔ اوپارے کہ شوریٰ کونسل نا چیئرمین و ڈل انا باسک آتون سرجم گپ و تران نا موقع ملا و سعودی ڈل انا کنڈآن پاکستان و خاص وڑاٹ سی پیک نا ڈٹ آتے ٹی زرکاری نا وارخواہی تیان فائدہ ہرفنگ نا بارواٹ گپ و تران نا موقع ملا۔ سعودی ڈل سی پیک ئِ نئے بیرہ پاکستان و چین بلکن مچ آ ڈیہہ کن فائدہ تروک گوندا۔ چیئرمین سینیٹ پارے کہ سینیٹ آف پاکستان و سعودی شوریٰ کونسل نا نیام اٹ کمکاری ئِ برقرار تخنگک۔ او پارے کہ ہڑتوم آ ملک آک جہانی کہول آ کمکاری ئِ پین ودفنگ و پاکستان نا ایشیائی پارلیمانی اسمبلی نا کماشی نا منصب ئِ سنبھالنگ آن پد سعودی عرب نا کنڈآن مخ تفی پاکستان کن سوگوی نا سوب مریک۔ سعودی شوریٰ کونسل نا چیئرمین ڈل انا دورہ ئِ بے کچ اہم گوندا و پارے کہ پاکستانی سرکڑدہ غاتون جوان گپ و تران نا موقع ملانے۔ اومہانداری آ چیئرمین سینیٹ، سینیٹر مہمان داری و سینیٹ سیکرٹریٹ نا منت واری ئِ ہرفیر۔
