اسلام آباد۔ 26اپریل (اے پی پی) بنجائی وزیر مواصلات مراد سعید پارینے کہ ساڑی حکومت نا دور اٹی ٹول پلازہ غاتیان ریونیو ٹی 10 ارب روپئی نا ودکی مسنے ، مستین اٹی مروک آ لٹ وپل چٹانے و جعلی اکاﺅنٹ آتے ٹی ہنوک آ پیسہ غاک ہم سلیسنو۔ داخیال آتا درشانی ئِ او جمعہ نادے آ ایوان بالا ٹی وقفہ سوج آتے ٹی سینیٹر بہرہ مند تنگی و سسی پلیجو نا سوج آتا ورندی ٹی کرے۔ مراد سعید ایوان ئِ پارے کہ مچ آ ملک اٹی موٹروے تیا 75ٹول پلازہ کاریم کننگ ئُ و ہر 35آن 70 کلومیٹر نا فاصلہ غا بایدے ٹول پلازہ اس مرے۔ ٹھٹھہ ٹی نن پوسکن ئُ ٹول پلازہ اس جوڑ کتنون، ٹول خراج نا وصولی ئِ شفاف کننگ کن انٹیلی جنٹس ٹرانسپورٹ سسٹم اس درستی راستی کرفنگ انگ ئِ ، مستین اٹی ٹول وصولی و ٹھیکہ غاتے ٹی لٹ و پل مسنے و ٹول وصولی نا پن آ فراڈ کننگاکہ ہراداسہ مفننگ ئِ۔ اوپارے کہ تدوک آ اسہ سال اٹی ایم ون آ جوڑ ٹول پلازہ غاتیان 2ارب روپئی آن زیات نا کٹیا مسنے۔
