لاہور۔ 26اپریل (اے پی پی) صدر مملکت ڈاکٹر عارف علوی پارینے کہ دنیا ٹی ودی مروک آ بدامنی نامذہب تون ہچ ئُ تعلق اس اف، غٹ مذہب آک امن نا کلہو ئِ ایترہ ولے داڑے انسانک مذہب نا آڑ اٹی اسہ ایلو نا خون ئِ کننگ ئُ ہرانا بھلا سوب انسان نا تہہ ٹی ساڑی خارک ئُ، پوسکن آ پاکستان اٹی ہر مذہب کن امن و آشتی نا کلہو ئِ ولے حکومت نا زمواری تینا جاگہ غا، عالم دینک و سرکڑدہ غاک ہم امن ، ایلمی نا قیام اٹی تینا بایدے کڑد ئِ ادا کیر انتئے کہ پاکستان ہمو جاگہ ئِ ہراڑے ہر اسٹ ئِ بریبری حق دوئی ئِ و وطن عزیز امن کن مون آ ہِننگ ئِ۔ او جمعتہ المبارک نا دے آ داڑے ہندی ہوٹل اٹی قومی بین المذاہب امن کانفرنس آن تران کریکہ۔ داوخت آ خاتون ول بیگم عارف علوی، باسک قومی اسملبی شنیلا روت، خطیب بادشاہی مسجد عبدالخبیر آزاد تون اوار سکھ، عیسائی ، ہندو، بہائی مذہب آتا راہشونک ساڑی ئسر۔ صدر پارے کہ داہیت ستاکڑزک کہ ساڑی حالیت آتے ٹی بین المذاہب ہم آہنگی نا مون آ دننگ نا کوشست آک برجائُ ۔ اوپارے کہ ای غٹ مذہب آتے خواناٹ تو اندازہ مس کہ کل مذہب آک امن نا کلہو ئِ ایترہ ولے انسان مذہب ئِ تینا گندہ انگا مسخت آتے کن کاریم اٹ اتیک و دادے بہانہ اس کرسا ایلو انسان تے خلیک ہرا نا اسہ مذہب اسے تون ہم تعلق اف۔
