اسلام آباد۔ 26اپریل (اے پی پی) وزیراعظم عمران خان علاقائی رابطہ غاتا مون آ دننگ، نیزگاری نا چٹفنگ، مالیاتی انتظام و انصرام ، عبوری ڈٹ، ڈی اے ایس یو، بنداوی پنجر نا ڈٹ و کاروبار ئِ آسان کننگ اٹ جہانی بینک انا کڑد انا ستائِ کرینے۔ اوداہیت ئِ جمعہ نادے آ بیجنگ اٹی ارٹ میکو بیلٹ اینڈ روڈ فورم نا وخت آ جہانی بینک انا چیف ایگزیکٹو آفیسر کرسٹینا جیورجیا تون اوڑدہی ٹی گپ و تران کرسا پارے، وزیر خارجہ شاہ محمود قریشی ، سلاہکارخزانہ ڈاکٹر عبدالحفیظ شیخ و سلاہکار واپار عبدالرزاق داﺅد ئسک ہم داوخت آ ساڑی ئسر۔ یات سلے کہ وزیراعظم بیلٹ اینڈ روڈ فورم اٹی شرکت و چینی سرکڑدہ غاتیان بیدس ایلو جہانی راہشون آتون اوڑدہی کن چین نا چاردے ئی دورہ غاٹی ئِ۔ وزیراعظم جہانی بینک انا سی ای او ئِ ملک انا اقتصادی و مالی حالیت ئِ گچین کننگ کن حکومت نا گام گیج آتیان معلومدار کرے۔ وزیراعظم علاقائی رابطہ غاتا مون آ دننگ، نیزگاری نا چٹفنگ ، مالیاتی نظام و انصرام ، عبوری ڈٹ ، ڈی اے ایس یو، بنداوی پنجر نا ڈٹ و کاروبار ئِ آسان کننگ اٹ جہانی بینک انا کڑد انا ستائِ کرے۔ وزیراعظم جہانی بینک انا سی ای او ئِ راجی و اقتصادی گچینی کن گام گیج و راجی رکھ انا پروگرام احساس نا بارواٹ ہم معلومدار کرے۔ جہانی بینک انا سی ای او پاکستان تون ڈسبر سمنٹ پروگرام لینڈنگ و درملکی فنڈآتا دوئی کننگ کن ضمانت نا فراوانی نا بشخ آتے ٹی شریداری ئِ سوگوی تننگ نا عزم انا اعادہ ئِ کرے۔
