بیجنگ۔ 26اپریل (اے پی پی) وزیراعظم عمران خان پارینے کہ پاک چین اقتصادی راہداری پاکستان کن نعمت اسے آن کم اف، سی پیک پاکستان ئِ ایلو شون ہلوک قوم تا بریبر اتنگ نا موقع اس فراوان کرینے، اقتصادی شونداری و شونہالی کن امن و سوگوی المی ئِ، پاکستان امن و سوگوی ئِ المی کننگ کن تینا کڑ دئِ ادا کننگ ئِ۔ جمعہ نادے آ بیجنگ اٹی بیلٹ اینڈ روڈ فورم نا وخت آ پاک چین فرینڈ شپ ایسوسی ایشن و پاک چین کلچرل ایسوسی ایشن نا کنڈآن دے انا اِرغ آن تران کرسا وزیراعظم عمران خان پارے کہ چین نا صدر شی جن پنگ ستاکڑزنگ نا لائق ئِ ، ہرا دا جہانی فورم اٹی جہانی راہشون تے سلہ خلک۔ داڑان چین نا ودوک آ اقتصادی واک انا عکاسی مریک۔ اوپارے کہ لس وڑاٹ ایلم تیٹی اسہ ایلم نا شونداری آ ایلو ایلم کست اٹ اختہ مریک ولے پاک چین سنگتی نا معاملہ جتا ئِ۔ پاکستا ن و چین ایلم و سنگت ملک ئُ و چین نا شونداری آن پاکستان ئِ ہم خوشی محسوس مریک۔ وزیراعظم پارے کہ پاک چین اقتصادی راہداری بیلٹ اینڈ روڈ گام گیج نا اہم ئُ بشخ اسے و دا پاکستان کن نعمت اسے آن کم اف ۔ پاکستان دنیا نا ایلو ملک آتیانبار شیف و بڑزی نا گواچی مسنے۔ پاکستان ئِ داڈٹ آن بھاز فائدہ مسنے و مریک۔ داننکن اسہ نعمت اسے و داڈٹ پاکستان ئِ ایلو شون ہلوک قوم تا بریبر اتنگ نا موقع اس تسنے، سی پیک پاکستان اٹی زرکاری نا وارخواہی ہم تسنے۔ اوپارے کہ چین دنیا نا ترند شون ہلوک آ معیشت ئِ۔ سی پیک اٹی نئے بیرہ چین بلکن ایلو ملک آتیان ہم خلقت زرکاری کن پاکستان آ بریرہ۔ اوپارے کہ او تینا ملک انا کنڈآن سی پیک نا پورو مخ تفی نا پڑو ئِ کیک، مچ آ ملک سی پیک نا مخ تف ئِ ، وزیراعظم پارے کہ بنائی وڑاٹ سی پیک روڈ و توانائی نا اسٹیشن آتسکان محدود ئس ولے داسہ داٹی ودکی بسنے۔ چین وپاکستان نا نیام اٹ کمکاری بسنے، پاکستان کشت وکشار، نیزگاری نا چٹفنگ، کشاری و سائنسی ٹیکنالوجی نا بشخ اٹی چین نا کمکاری نا خواہندار ئِ ۔ ننے معلوم مسنے کہ چینی یونیورسٹیک مصنوعی ذہانت ئِ شون تننگ آ کاریم نا بنائِ کرینو۔ داوخت آ چندی ہندن ئُ ٹیکنالوجی ارے ہرافتے ٹی چین دنیا نا شون ہلوک قوم تیان مون آٹے۔ ننے اومیت ئِ کہ چین ٹیکنالوجی نا فراوانی ٹی پاکستان تون کمک کیک۔ وزیراعظم پارے کہ نیزگاری ٹی کمتی اہمیت تخوک ئُ معاملہ اسے، انسانیت نا تاریخ اٹی چین ئِ دالحاظ اٹ جتائُ حیثیت اس دوئی ئِ کہ او 30 سال اٹی 70 کروڑ خلقت ئِ نیزگاری آن کشا۔ پاکستان نیزگاری نا چٹفنگ اٹ چین نا کمک نا خواہندار ئِ ، پاکستان نا حکومت نیزگاری و پسماندگی نا چٹفنگ نا پروگرام اس بناکرینے، ننا است خواہی ئِ کہ نن اومیت کینہ کہ چین دا بشخ اٹی پاکستان تون کمک کیک، وزیراعظم پارے کہ نن نئے بیرہ چینی زرکاری بلکن خصوصی اقتصادی زون تیٹی چینی زرکاری خوانہ۔ وزیراعظم پارے کہ اقتصادی شونداری و شونہالی کن امن و سوگوی المی ئِ، پاکستان امن و سوگوی ئِ المی کننگ کن تینا کڑد ئِ ادا کننگ ئِ، پاکستان اوغانستان نا ویل انا سیاسی ایسری خواہک ، طالبان و اوغان حکومت و امریکہ نا نیام اٹ مذاکرات اٹی پاکستان تینا کڑد ئِ ادا کننگ ئِ، ننے اومیت ئِ کہ اوغانستان اٹی امن و سوگوی بریک انتئے کہ اوغانستان اٹی بدامنی و نزوری آن پاکستان نا سیمی علاقہ غاک زہمی مریرہ، پاکستان نا ایران تون ہم گچین تعلقداری ئِ و ایران تون تعلقداری تے پین مون آ دننگ خواہک۔ وزیراعظم پارے کہ بھارت تون ویل ساڑی ارے ،ننے اومیت ئِ کہ بھارت اٹی گچین کاری تیان پد پاک بھارت مذاکرات دُوارہ بناکیک تانکہ ہڑتوم آ ملک آتا نیام اٹ مذہب تعلقداری استوار مرے۔ وزیراعظم پارے کہ زمانہ طالب علمی ٹی ہراتم وزیراعظم چواین لائی پاکستان نا دورہ ئِ کرے تو اسکول و کالج آتا طالب علم آک چینی و پاکستانی بیرک ئِ ہرفسا اودے بخیر کریسر۔ وزیراعظم اِرغ نا اڈتننگ آ منتظمین آتا خصوصی وڑاٹ منت واری ئِ ہرفے۔
