پاکستان پرامن و شونہال دنیا نا ویژن ئِ سرسہب کننگ کن تینا کڑدئِ برجاتخک، جہانی کمکاری کن ارٹ میکو بیلٹ اینڈ روڈ فورم آن تران شرف نا سوب ئِ، چین پاکستان اقتصادی راہداری ڈٹ بی آر آئی نا اسہ بھلو جزو اسے، گوادر ترندی اٹ واپاری ہند اس مننگ ئِ، چین اتون پاکستان نا شریداری و ایلمی نا رشتہ سوگو بنداو تیا گنڈوک ئِ، پاکستان اٹی قومی کہول آ 10 ارب درخت خلنگ نا ڈٹ انا بنائِ کرینن
بیجنگ۔ 26اپریل (اے پی پی) وزیراعظم عمران خان پارینے کہ پاکستان پرامن و شونہال دنیا نا وژن ئِ سرسہب کننگ کن تینا کڑد ئِ برجاتخک، جہانی کمکاری کن ارٹ میکو بیلٹ اینڈ روڈ فورم آن تران شرف نا سوب ئِ، اسہ روڈ و اسہ ڈیہہ نا نظریہ راستکی ٹی بدل مننگ ئِ، چین پاکستان اقتصادی راہداری ڈٹ بی آر آئی نا اسہ بھلو جزو اسے ، گوادر ترندی اٹ بنجائی ہنداس مننگ ئِ ، چین اتون پاکستان نا شریداری و ایلمی نا رشتہ سوگو بنداو تیا ٹی ئِ، پاکستان اٹی قومی کہول آ 10 ارب درخت خلنگ نا ڈٹ انا بنائِ کرینن، جہانی شریداری ئِ مون آ دننگ نا بابت اہم ایونٹ نا اڈتننگ آ چین نا صدر ژی جن پنگ و السی جمہوریہ چین نا حکومت ئِ مبارکباد پیش کیوہ، فورم اٹی شریدار و سنگت آتا بشخ ہلنگ آن بیلٹ اینڈ روڈ(بی آر آئی) ویژن کن آخبت نا ایجنڈا ئِ جوڑ کننگ اٹ کمک رسینگک۔ جمعہ نادے آ بیجنگ اٹی ارٹ میکو بیلٹ اینڈ روڈ فورم آن تران کرسا وزیراعظم عمران خان پارے کہ جغرافیائی و سیاسی غیر یخینی نا جہانی حالیت، بے بریبری ٹی ودکی و واپاری اڑاند آتا چٹفنگ کن بی آر آئی جہانی کمکاری، شریداری، رابطہ غاتا مون آ دننگ و اسیجا شونہالی نا گچین ئُ ماڈل اس پیش کیک۔ اوپارے کہ بی آرآئی آن گلوبائزیشن نا ساڑی آ حالیت آتے ٹی دنیا نا قوم تے شونداری نا بابت اسہ پوسکن ئُ و اہم ئُ مرحلہ سے کن وارخواہی دوئی مریک۔ فورم اٹی جہانی راہشون تا بھلو کچ اسے ٹی بشخ ہلنگ داہیت انا شاہدی ئِ کہ نن بے اومیتی نا جاگہ غا اومیت و اختلاف آتا مون ئِ توننگ کن تین پہ تینی کمکاری ئِ گچین کرینن۔ وزیراعظم پارے کہ بی آر آئی نا ویژن نا رداٹ تاریخی شونداری نا نظریہ غا 122ملک و 49 جہانی ادارہ غاک دستخط کرینو۔ اوپارے کہ پاکستان بی آر آئی ٹی شریدار مننگ آ گمرکیک و نن چین اتون جہانی شونداری و شونہالی نا تغ ئِ راست اٹ بدلیفنگ کن بنداوی شریدار اُن۔ اوپارے کہ پاکستان بی آر آئی نا بناآن ہی ڈٹ اٹی اوار ئِ و چین پاکستان اقتصادی راہداری ڈٹ(سی پیک) بی آر آئی نا اسہ بھلو جزو اسے و داویژن نا رداٹ بناکروک آ اولیکو ڈٹ ئِ ہراپبی شون ہلنگ ئِ۔ اوپارے کہ پاکستان اٹی توانائی نا فراوانی ٹی ودکی مسنے وخت اس کہ نن بنداوی پنجر نا خامی تیا سرسہبی اٹ مون ئِ تورینن۔ اوپارے کہ گوادر ہراوخت اس اسہ چنکو مچھی ہلوک آتا خلق اس مسکہ ترندی اٹ واپاری ہنداس مننگ ئِ و گوادر اٹی جوڑ مروک آ ایئر پورٹ ملک انا غٹ آن بھلا ایئر پورٹ مریک۔ اوپارے کہ پاکستان و چین اواری اٹ سی پیک نا ارٹ میکو مرحلہ ٹی پترینگ انگ ئُ ہراٹی راجی و اقتصادی شونداری، نیزگاری نا چٹفنگ، کشاری کمکاری و صنعتی شونداری آ خصوصی چکار کننگک۔ اوپارے کہ نن تعلیم، پوسکن آ ایجاد و ٹیکنالوجی نا بشخ اٹی ہم تین پہ تینی رابطہ غاتا مون آ دننگ آن پاک چین شریداری ئِ ودفنگ اُن۔ وزیراعظم پارے کہ سی پیک تون اوار اوار خصوصی اقتصادی زون جوڑ کننگانے ہراڑے پاکستانی، چینی و جہانی ادارہ غاتے زرکاری نا وارخواہی پیش کننگ انگ ئِ۔ سی پیک نا ارٹ میکو مرحلہ غا گپ و تران کرسا وزیراعظم عمران خان پارے کہ نن چین اتون پاک چین آزادانہ واپار اٹی پین ودکی کن معاہدہ کننگ اُن۔ وزیراعظم چین و اونا سرکڑدہ غاتا کنڈآن پاکستان نا پبی کمکاری آ منت واری ئِ ہرفسا پارے کہ ننا سنگتی لازوال و بھاز متکن ئِ وخت اس کہ چین اتون پاکستان نا شریداری و ایلمی نا رشتہ سوگوبنداوتیا ٹی ئِ ہرا ہر مشکل نا ساہت اٹی پورو سلیسنو۔ بی آر ایف آن تران نا موقع ئِ اہم گوندسا وزیراعظم فورم نا بشخ ہلوک آتے سلہ خلک کہ او پاکستان اٹی آزادانہ درملکی زرکاری نا چاگڑد آن فائدہ ہرفر و ننا معیشت اٹی شریدار مریر۔ اوجہانی برادری ئِ پاکستان نا بنداوی پنجر، ریلوے، ڈیم تا جوڑ کننگ، آئی ٹی و مینو فیکچرنگ نا بشخ آتے ٹی زرکاری نا خصوصی سلہ خلک۔ وزیراعظم پارے کہ اسہ روڈ و اسہ ڈیہہ نا نظریہ پین سوگو مننگ ئِ۔ اوکانفرنس نا بشخ ہلوک آتے جہانی کہول آ الس نا راجی و آسراتی آ چکار کننگ نا سلہ خلک و پارے کہ داڑان نن پائیدار معاشی شونداری نا درکار ہدف آتا دوئی کننگ نا کنڈا سرسہبی اٹ سفر کننگ کینہ۔ اوپارے کہ چین نا صدر ژی جن پنگ تینا تران اٹی منہ گڑاسے نا ذکر ئِ کرینے وخت اس کہ ای ہم دابابت منہ اولیت آتے پیش کننگ خواوہ ہرافتیان غٹ آن اولیکو اولیت موسمیاتی بدلی نا نسخان تے کم کننگ نا بابت اسیجا ڈٹ آک ئُ۔ اوپارے کہ نن صوبہ خیبر پختونخوا ٹی گدرینگوک آ 5سال اٹی اسہ ارب درخت خلنگ نا ڈٹ ئِ سرسہبی اٹ پورو کرینن وخت اس کہ چلی نا صدر ہم موسمیاتی بدلی نا بابت تینا تران اٹی خصوصی ذکر ئِ کرینے۔ اوپارے کہ نن پاکستان اٹی قومی کہول آ 10 ارب درخت خلنگ نا ڈٹ انا بنائِ کرینن و ای سلاہ ایتیوہ کہ ننے دنیا ٹی بروک آ 2سال اٹی 100 ارب درخت خلنگ کن اسیجا ڈٹ بایدے بناکروئی مرے تانکہ نن تینا بروک آ چین تے موسمیاتی بدلی تا زہم آتیان رکھ کرسا داڑان مروک آ نسخان آتے کم آن کم کننگ کین۔ وزیراعظم پارے کہ ننے بی آر آئی نا رداٹ سیل و سوات آ خصوصی چکار کروئی مریک، پاکستان سیل و سوات نا شونداری و مون آ دننگ آ خصوصی چکار کننگ ئِ تانکہ نن الس نا الس تون رابطہ غاتے ودفنگ تون اوار اوار بین الثقافتی ہم گرنچی ئِ مون آ دننگ کین ۔ وزیراعظم پارے کہ ننا مسٹ میکو اولیت بدعنوانی نا توننگ کن تین پہ تینی کمک بایدے مرے تانکہ نن اواری اٹ وائٹ کالر کرائمز نا مون ئِ توننگ کین انتئے کہ وائٹ کالر ڈوہ آن دنیا بھاز بے وڑ زہمی مننگ ئِ۔ اوپارے کہ پاکستان بدعنوانی نا توننگ و وائٹ کالرکرائم نا مون ئِ توننگ کن جامع گام گیج کننگ ئِ ہراٹی جہانی برادری نا شریداری آن درکار ہدف آتا نتیجہ غاتے آسان کننگ مریک۔ وزیراعظم چارمیکو اولیت نا بارواٹی پارے کہ جہانی برادری ئِ بایدے مرے کہ او نیزگاری نا چٹفنگ کن اواری اٹ گام گیج کے۔ پاکستان ہم ملک اٹی نیزگاری نا چٹفنگ و غذائی کاختی نا مون ئِ توننگ کن قومی کہول آ کوشست آتا بنائِ کرینے۔ اوپارے کہ پاکستان اٹی نن ساڑی ہی ٹی نیزگاری نا چٹفنگ کن احساس پروگرام نا بنائِ کرینن ہرانا مسخت چین نا ماڈل آ خلقت ئِ نیزگاری آن کشوئی ئِ انتئے کہ چین مسہ دہائی ٹی تینا 800 ملین بندغ ئِ نیزگاری آن کشنگ اٹ سرسہبی دوئی کرینے۔ پاکستان نا پنچ می اولیت نا بارواٹی وزیراعظم پارے کہ نن واپار اٹی پین آسانی و زرکاری ئِ مون آ دننگ کن جامع گام گیج کننگ اُن تانکہ جتا اسیجا ڈٹ آتے ٹی ننا کاروباری برادری و نجی بشخ انا است بڈی مننگ کے۔ وزیراعظم عمران خان پارے کہ چین نا شاندار تہذیب مچ آ دنیا ئِ شعور، تین پہ تینی شرف ، سگ و سوگوی تسنے۔ اوپارے کہ چینی دودوربیدگ آن جہانی کہول آ انسانیت ئِ چندی ٹیکی تے تننگا و داکان بیدس چین بھلا اہم و نمان ایجاد آتے درستی راستی کرفنگ تون اوار اوار آرٹ و کلچر تون اوار جہانی کہول آ امنا ئِ مون آ دننگ اٹ ہم اہم ئُ کڑد اس ادا کرینے۔ وزیراعظم پارے کہ پاکستان تین پہ تینی شرف و بیربری نا بنداو آ تینا عمل ئِ برجاتخک و چین تون اوار بی آرآئی نا ایلو شریدار آتون اواری اٹ نن تینا الس نا گچین آخبت ئِ المی کننگ کن کاریم ئِ برجاتخنہ۔ اوپارے کہ پاکستان پرامن و شونہال دنیا نا ویژن ئِ سرسہب کننگ کن تینا کڑد ئِ برجاتخک۔ اوپارے کہ نن اواری اٹ کاریم کننگ نا است خواہ اُن تانکہ آخبت اٹی اومیت و شونہالی نا تغ ئِ راست انا دروشم اس تننگ مرے۔
