کوئٹہ۔ 25اپریل (اے پی پی) جامعہ بلوچستان نا بورڈ آف ایڈوانس اسٹڈیز ریسرچ نا 135می دیوان وائس چانسلر پروفیسر ڈاکٹر جاوید اقبال نا کماشی ٹی اڈ ہلک۔ دیوان اٹی ڈین فیکلٹیز ڈاکٹر ملک طارق، ڈاکٹر انور پانیزئی، ڈاکٹر محمد عالم مینگل، ڈاکٹر ریحانہ رشید، ڈاکٹر ندیم ملک، ڈاکٹر صوبیہ رمضان، رجسٹرار محمد طارق جوگیزئی تون اوار ایلو باسک آک بشخ ہلکر۔ دیوان اٹی تعلیمی ایجنڈا غا سجفنگا۔ ہراٹی بڑزکو تعلیم، پٹ وپول، ایم فل، پی ایچ ڈی ڈگری پروگرام، داخلہ و امتحان تا وڑوڈول، کورس ورک ریورٹ تون اوار چندی بشخ آتے ٹی اسہ پی ایچ ڈی و دہ ایم فل اسکالر آتے ڈگری ایوارڈ کن گچین کننگا و چندی فیصلہ غاتے کننگا۔ وائس چانسلر تینا صدارتی تران اٹی پارے کہ جامعہ بلوچستان اسکالرز و طالب علم آتے بڑزکو تعلیم نا فراوانی و پٹ وپولی سرجزآتا وارخواہی تننگ اٹ اہم ءُ کڑد اس ادا کننگ ءِ و صوبہ ٹی بڑزکو تعلیم ءِ مون آ دننگ کن گام گیج کننگ انگ ءِ۔ و یونیورسٹی سب کیمپس آتا کمک اٹ مارکیٹ تون مطابقت تخوک آ شعبہ غاتے اولیتی بنداو تیا مون آ دننگ انگ ءِ و زوت اسے اٹ یونیورسٹی سٹی کیمپس نا باقاعدہ بناءِ کننگک۔ اوپارے کہ جامعہ نا شونداری و گچینی کن گام گیج کننگ انگ ءِ و غٹ پالیسی ساز ادارہ غاتا وخت آ اڈ تننگ آن معاملہ غاتے ٹی وخت آ ایسری و ادارہ غاتا شونداری کن مثبت و گچین نتیجہ اس اخذ کننگک۔ اوپارے کہ اینخو نا سال بھلو کچ اسے ٹی اسکالرز آتے بڑزکو تعلیمی ڈگری ایوارڈ تننگانے۔ ہراکہ ہر بڑزکوتعلیمی ادارہ غاتے کن اہمیت اس تخک۔ و اسکالر آک ہم داوارخواہی تیان فائدہ ہرفسا گچین پٹ وپول و تخلیق آن تینا عملی زند و راج اٹی گچین کارکڑدگی نا درشانیءِ کیر و پوسکن آ اسکالر آتا راہشونی ءِ کیر۔
