اسلام آباد۔ 25اپریل (اے پی پی) بنجائی وزیر ریلوے شیخ رشید احمد وزیراعظم عمران خان نا سرکڑدہ ہی ٹی حکومت تینا 5سالہ آئینی مد ءِ پورو کیک، راولپنڈی آن لاہور ٹریک ءِ مسہ مرحلہ غاتے ٹی ڈبل کننگک، ڈٹ پورو مننگ آن پد راولپنڈی آن لاہور سفر اِراگھنٹہ 12منٹ انا مریک ہراوخت اسکان احتساب نا کیس آک ختم مفسہ ہچ گہس ءِ این آر او ملیپک، چنکا ڈوہ تیا بندغ آک جیل تیٹی ءُ ہنداوڑ ہی بھلا دُز و لٹ و پل کروک آتا برخلاف ہم بایدے کارروائی مرے۔ او پنچ شنبے نادے آ نیشنل پریس کلب اسلام آباد اٹی پریس کانفرنس آن تران کریکہ۔ اوپارے کہ شہباز شریف پاکستان اٹی ناجوڑ مریک، لندن آ کاہک تو جاگنگ ءِ شروع کیک، ہرالیڈر جیل آن خلیک او لیڈر اس مفک، بنجائی وزیر ریلوے پارے کہ ریلوے ٹریک ءِ ڈبل کننگ نا بابت کنا اِرا تغ ئسر ہرافتیان اسٹ آ 14سال آن پد وخت اس کہ ایلو آ یک و نیم تُو اٹی کاریم بناکیک، وزیراعظم عمران خان نا حکومت اٹی کوہالہ پاور و ایم ایل ون مسہ مرحلہ غاتے ٹی پورو کننگ اُن۔ اوپارے کہ وزیراعظم عمران خان ءِ وزیراعلیٰ پنجاب عثمان بزدار تون خنانن، ہراک پاننگ ءُ کہ وزیراعلیٰ ہِننگ ءِ او غلط فہمی نا گواچی ءُ۔ اوپارے کہ ای مدام عمران خان نا دفاع ءِ کریٹ و پین وخت اس ہم کرسا کیوہ۔ اسہ سوج اسے نا ورندی ٹی اوپارے کہ فردوس عاشق اعوان آزموندہ کار ءِ، وزارت اطلاعات ءِ چلیفنگ اونا ہی کاریم ءِ۔ مال گاڈیک بیرہ 4 درسد کارگو ہرفنگ ءُ ننا کوشست ءِ کہ کم از کم 20 درسد کارگو ٹرین آ اتینہ، چین ہم تینا ٹریک ءِ اپ گریڈ کرسا ریلوے ءِ شونداری نا کسر آ روان کرینے۔ اوپارے کہ چینی کمپنی نا کنڈآن کروک آ ساڑی آ سروے نا رداٹ داوخت آ 70.1 درسد خلقت ریلوے ٹریک انا ایب وکیب رہینگرہ، ہراٹریک ءِ ڈبل کننگ اٹ اڑاند مریک۔ اسہ سوج اسے نا ورندی ٹی او پارے کہ چوہدری نثارعلی خان ایم پی اے نا سوغند ءِ ہرفپننگ ءِ، اسد عمر تون رابطہ ٹی اُٹ۔ شیخ رشید احمد پارے کہ گورنر پنجاب تون راولپنڈی یونیورسٹی نا معاملہ غا اوڑدہی مسنے۔
