کوئٹہ۔ 25اپریل (اے پی پی) صوبائی وزیر داخلہ میر ضیاء اللہ لانگو چمن اٹی پولیو ورکرآتا ٹیم آ جلہو نا ترندانگا لوز آتے ٹی مذمت ءِ کرسا ضلعی انتظامیہ غان رپورٹ ءِ بٹنگانے، اوپنچ شنبے نادے آ چمن نا علاقہ سلطان زئی ٹی سم کاری آن تپاخت کروک و ٹھپی مروک پولیو ورکرآتا ڈکھ و است ہسونی نا درشانی ءِ کرے۔ صوبائی وزیر داخلہ میر ضیاء اللہ لانگو پارے کہ پولیو ورکرآتیا لغورانگا کارروائی ملک دشمن تا کاریم اسے، صوبائی وزیر داخلہ نا تعلقدار کمامدارآتے سم کاری ٹی اوار ڈوہدار آتے دمدستی دزگیر کننگ نا پارت کرسا پارے کہ پولیو ورکرآک ننا چناتے معذوری آن بچفنگ کن دے و نن خواری کیرہ، اوفتے خراج تحسین پیش کیوہ، پولیو ورکرآتا رکھ ءِ المی کننگے۔
