کوئٹہ۔ 25اپریل (اے پی پی) چندی سرکاری محکمہ غاتے ٹی غیر کانودی بھرتی، سرکاری ڈغار، فنڈ، و شونداری اسکیم تیٹی مبینہ نغڑد نا غاو، ڈی جی نیب بلوچستان دمدستی کارروائی نا پرمان تس۔ سرکاری فنڈ و وسیلہ غاتا لٹ وپل اٹ اوار عنصر آتے اوفتے اوفتا کروک نا جوابدہ جوڑ کننگک، سرکاری فنڈ آتا سہی وڑاٹ خڑچ کننگ بلوچستان نا حقی شونداری نا ضامن ءِ۔ وڈی خوری نا چٹفنگ کن بے پرخ کارروائی تا چرجوئی برجاسلک۔ داہیت ءِ ڈائریکٹر جنرل نیب بلوچستان محمد عابد جاوید نیب آفس اٹی اڈ ہلوک آ کھلی کچہری ٹی غاو تروک آتون گپ و تران اٹی کرے۔ بلوچستان نا چندی علاقہ غاتیان خلقت نا بھلو کچ اس ڈی جی نیب انا مون آ پیش مرسا وڈی خوری نا بابت غاو بمعہ دستاویزی شاہدی درج کرفیر۔ ڈائریکٹر جنرل نیب بلوچستان سرکاری محکمہ غاتے ٹی غیر کانودی بھرتی، الس نا راجی آسراتی نا ڈٹ، سرکاری شونداری اسکیم تیٹی مبینہ وڈی خوری نا بابت غاوتیا دمدستی پرمان ترسا سائل آتے کرپٹ عنصر آتا برخلاف بے پرخ کارروائی تا باوری کرفے۔ ڈی جی نیب بلوچستان داوخت آ پارے کہ قومی احتساب بیورو ملک آن وڈی خوری نا پورو چٹفنگ کن غٹ وسیلہ غاتے کاریم اٹ اتنگ ءِ، وڈی خوری اسہ ہندن ءُ ٹیکہ اسے ہرا ننا اسلامی راج انا بڑزکو قدر، زیبائی و روایت آتے درینے۔ شون ہلوک ملک آتا صف اٹی اوار مننگ کن ننے کرپشن نا برخلاف جنگ ءِ ایسر اسکان سرکروئی مریک۔ بلوچستان بڑزکو روایت آتا خلقت نا گل زمین ءِ، مہمانداری و ایمانداری جم وڑاٹ داجاگہ نا خلقت نا شیوہ مسنے۔ کرپٹ عنصر آک پیسہ غاتا حڑس و حوس اٹ داجاگہ نا روایت آتا حسن ءِ مانند کننگ کپسہ۔ داکان مست ڈی جی نیب بلوچستان غاو سیل ءِ کھلی کچہری ٹی ملوک آ غاوتیا دمدستی کارروائی و پیش رفت آن معلومدار کننگ نا پرمان تس۔
