فیصل آباد۔ 25اپریل (اے پی پی) صدر مملکت ڈاکٹر عارف علوی پارینے کہ سیاسی پامداری نا درشانی ءِ کرسا معاشی شونداری ءِ سال آتے اٹ آخا بلکن تُوتیٹی ممکن کننگ مریک۔ داڑکن ننے سٹی آ شرہ و تینا تین پہ تینی جھیڑہ غاتیان ایڑتر قوم اسے نا وڑاٹ تینا کڑد ءِ ادا کروئی مریک انتئے کہ ہراتم قومک اجتماعی ملکی و قومی سوچ انا درشانی ءِ کرسا مشکل آتیان پیش تمنگ نا سوگو عزم ءِ کیرہ تو ولدا اللہ ہم اوفتے کن کسر ملک ایلو دروشم اٹ اسہ ایلو نا اختلاف آتا گواچی قوم تا مقدر اٹ تنزلی آن بیدس ہچ اس مفک نیز ننے عالم اقوام نا مقابلہ ءِ کننگ کن ہم مثبت اجتماعی سوچ اس نشان تروئی مریک۔ پنچ شنبے نادے آ فیصل آباد نا ہندی ہوٹل اٹی ایوان صنعت وواپار نا کنڈآن اڈ ہلوک آ بزنس ایکسیلنس ایوارڈ آتا دودآن تران کرسا اوپارے کہ پاکستان بھارت تون گچین تعلقداری خواہک منافقت و منافرت آخا بلکن بھارت جنگی گنوکی ٹی اختہ ءِ ہراہچ ءُ حالیت اسے ٹی ڈیہہ نا فائدہ ٹی اف حتیٰ کہ بھارت اٹی میڈیا، الیکشن مہم اٹی شریک گڑاس سیاسی جماعت آک و الس ڈیہہ ٹی جنگ مسلط کننگ کن دے و نن ءِ اسٹ کریسر ولے اوفتا برعکس میڈیا، سیاسی و مذہبی جماعت و الس بے کچ دانش مندی نا درشانی ءِ کرسا جنگی گنوکی ٹی اختہ بھارت نا جنونی پوفانک آن تہوءِ کشار و حالیت آتے پین بے چیٹ و بگڑینگ انگ آن بچفیر ہراڑتون اوار اوار پاکستان انتہاپسندی و دہشت گردی نا بے کچ سرسہبی، دلیری و دانشمندی اٹ مقابلہ ءِ کرے و بالآخر ہزار آ نہادی جان تا قربانی ءِ ترسا ملک آن انتہاپسندی و دہشت گردی نا چٹفنگ ءِ المی کرے داآخا بلکن ننا وطن عزیز اسہ انوکھاءُ ملک اسے ہرا مشکل حالیت آتیان پد ہم ہراتم دنیا نا مہذب انگا ملک آک اوغان باہوٹ آتے پناہ تننگ کن تیار الورہ ہمووخت آ پاکستان نئے بیرہ 35لکھ انا خڑک اوغان باہوٹ آتے پناہ تس بلکن داوخت اسکان بھلو کچ اسے ٹی اوغان باہوٹ آتا میزبانی ءِ کننگ ءِ ہنداخاطران پاکستانیک من حیث القوم تینا کڑد آ بایدے گمر کیر۔ اوپارے کہ فیصل آباد ملک انا مسٹ میکو بھلا صنعتی و برآمدی شار ءِ ہرا شونداری نا مزل آتے طے کننگ کن تیار ءِ وخت اس کہ معیشت نا گچینی داسہ سال آتے اٹ آخا بلکن بیرہ تُو تا ہیت اسے اوکان پد صنعتی بشخ پیدوار ءُ ریلیف اس محسوس کیک۔ اوپارے کہ مچ آ دنیا ٹی تالان مروک آ آئی ٹی سیکٹر نا مارکیٹ اٹی تینا بشخ ءِ ودفنگ و ڈیجیٹل اکاؤنٹ آتے ٹی ودکی کن پبی گام گیج و غٹ لائخی تے کاریم اٹ اتوئی مریک نیز زالبول آک اُراٹی تولوک آئی ٹی سیکٹر ءِ مون آ دننگ اٹ تینا کڑد ءِ ادا کننگ کیرہ۔ داوخت آ صدر مملکت ڈاکٹر عارف علوی گچین صنعتی و کاروباری کارکڑد نشان تروک آ بندغ آتے ٹی بزنس ایکسیلنس ایوارڈ بشخ وپانٹ کرے۔ دود انا ایسر آ فیصل آباد چیمبر نا ایگزیکٹو ممبر امین اسلم مہمان خاص صدر مملکت ڈاکٹر عارف علوی ءِ فیصل آباد چیمبرآف کامرس نا کنڈآن غلاف کعبہ نا ٹکر اسے نا ٹیکی و نشان فیصل آباد ہم پیش کرے۔
