اسلام آباد۔ 25اپریل (اے پی پی) بنجائی وزیر کانود بیرسٹر فروغ نسیم نیب اٹی تقرری تا بابت سوج انا ورندی ءِ بے است جم گوندسا پارینے کہ دا معاملہ ءِ چیئرمین نیب انا نوٹس اٹ اتنگے۔ پنچ شنبے نادے آ قومی اسمبلی ٹی وقفہ سوج آتے ٹی رانا ثناء اللہ نا سوج انا ورندی ٹی وزیر کانود بیرسٹر فروغ نسیم پارے کہ اولیکو کھیپ آن بیدس نیب اٹی بنائی تقرری تے یا تو نیب تینٹ کرینے یا نیب ملازم آتا قواعد و شرائط ملازمت 2002 ء و وڑوڈول تقرری و اہلیت و وقتافوقتا داٹی کروک آ ترمیم آتے ٹی تروک آ وڑوڈول انا رداٹ ٹیسٹنگ ایجنسی نا کمک اٹ کننگانے۔ نیب تینا بناآن ہلسا داوخت اسکان ہشت مرحلہ غاتے ٹی گریڈ 16آن 21نا آفیسر آتا تقرری ءِ کرینے۔ اسہ آفیسر اسے جعلی ڈگری نا سوب آن نیب ملازمت آن اینک کرے۔ رانا ثناء اللہ پارے کہ او دا ورندی آن است جم اف ہراڑا بیرسٹر فروغ نسیم پارے کہ او دا سوج انا بارواٹ چیئرمین نیب تون تینٹ ہیت کیک۔ اگہ ورندی است جم بتو تو ولدا ہندن مریک دن کہ باسک آک سلاہ تسنو۔ اسپیکر دا سوج ءِ موخر کرے۔
