اسلام آباد۔ 25اپریل (اے پی پی) بنجائی وزیر مواصلات مراد سعید پارینے کہ پاکستان نا اولیکو روڈ سیفٹی پالیسی ءِ جوڑ کننگانے، کراچی ناردرن بائی پاس نا جوڑ کننگ کن فنڈنگ آ سجفنگ انگ ءِ، کنسلٹنٹ و کنٹریکٹر ملنگ آ ساڑی آ سال انا ایسر اسکان اونا جوڑ جاڑی کاریم نا بناءِ کننگ مریک، اسلام آباد میٹروبس پروجیکٹ 30 جون آ پورو مریک۔ پنچ شنبے نادے آ قومی اسمبلی ٹی وقفہ سوج آتے ٹی وزیر مواصلات مراد سعید پارے کہ 56کلومیٹر کراچی ناردرن بائی پاس نا بھلو گرج اسے، داڑاکاریم نا بناءِ کرینن، فزیبلٹی و پی سی ون آ کاریم نا بناءِ کرینن، دادے بی او ٹی بنداو آ جوڑ کینہ۔ عبدالقادر پٹیل نا سوج انا ورندی ٹی مراد سعید پارے کہ حکومت پاکستان نا اولیکو روڈ سیفٹی پالیسی ءِ جوڑکرینے، صوبہ غاتون اوار ی اٹ داپالیسی ءِ جوڑ کننگانے، داڑاعملدرآمد نا وخت بسنے، زیات لوڈمینجمنٹ نا سوب آن شکست آتون اوار ایلو ویل آک ءُ، اوپارے کہ داوخت آ کراچی ناردرن بائی پاس نا زیات تر بشخ اسہ رویہ ءِ۔ دادے اِرارویہ کننگ نا ڈٹ بندی کننگانے۔ کنسلٹنٹ آتا پٹنگ نا بناءِ کننگانے۔ پی پی پی طرز یا پی ایس ڈی پی نا کمک اٹ دانا فنڈنگ آ سجفنگ انگ ءِ۔ کنسلٹنٹ و کنٹریکٹر آتا ملنگ آن پد سال 2019ء نا ایسر آ دانا جوڑ جاڑی کاریم تا بناءِ کننگ مریک۔ شیخ روحیل اصغر نا سوج انا ورندی ٹی مراد سعید پارے کہ راولپنڈی آن جہلم اسکان سڑک نا جوڑ جاڑ نا کاریم نابناءِ کرینن۔ غٹ شاہراہ تا جے ایس میپنگ ءِ کننگ اُن داڑان ریونیو 100 ارب روپئی اسکان سرمریک۔ دا کاریم مستین اٹی متنے۔ صاحبزادہ صبغت اللہ نا سوج انا ورندی ٹی مراد سعید پارے کہ تیمرگرہ و چکدرہ چترال گچین ءُ ایکسپریس وے اس جوڑمریک دادے نن سی پیک اٹی اوار کرینن۔ دا دیکی روٹ انا بشخ اسے۔ شیر اکبر خان نا سوج انا ورندی ٹی مراد سعید پارے کہ حکومت اسلام آباد میٹروبس پروجیکٹ ءِ پورو کننگ اٹ است خواہی ہلنگ ءِ۔ پی ایس ڈی پی فنڈ سہ ماہی بنداو تیا جاری کینہ تاخیر نا سوب گڑاس تعطل بریک۔ دا ڈٹ انا پوروی 30 جون ءِ۔ اوپارے کہ کراچی سدرن بائی پاس آن کاروبارخواجہ، طالب علم آتے وار اوار ہنوک بروک آتے کارڈ جاری کیر تانکہ ٹول آن استثنیٰ ملنگ کے۔
