اسلام آباد۔ 25اپریل (اے پی پی) بنجائی وزیر پوسٹل سروسز مراد سعید پارینے کہ وزیراعظم سرکاری ادارہ غاتا خط وکتابت و ایلو مواد آتا ترسیل کن پوسٹل سروس نا خذمت آتے ہلنگ نا باقاعدہ منظوری ءِ تسنے، فرنچائز پوسٹ آفس آتا کچ ءِ 15ہزار اسکان دینہ، پوسٹل سروس آتا نسخان 52ارب آن گدرینگانے ولے اودے زوت نسخان آن کشنہ، پوسٹل سروس آتے ٹی مروک آ بھرتی تیٹی میرٹ ءِ مون آ تخنگتنے۔ پنچ شنبے نادے آ وقفہ سوج آتے ٹی پرنس محمد نوازالائی نا سوج انا ورندی ٹی وزیر پوسٹل سروسز مراد سعید پارے کہ پوسٹل سروس آتا نسخان 52 ارب آن ودا، میرٹ نا برخلاف بھرتی کننگا، نن نسخان آن پیش تمنگ اُن۔ ای کامرس، ارجنٹ میل سروس نا بناءِ کرین، لائیو ٹریکنگ ڈے ڈیلیوری نا بناءِ کرین، نن ایپلی کیشن اس درستی راستی کرفینن، پاکستان نا ورناتے گچین و آسان روزگار تننگ آن لوکل مارکیٹ گچین مریک۔ پوسٹل سروس آک ورناسے نا کسب کاری آ اودے روگار تننگ نا فیصلہ ءِ کرینو۔ فرنچائز پوسٹ آفس 15ہزار اسکان دینہ، داوخت آ یک و نیم سد ءُ، نادرا غان ٹیکنالوجی ٹرانسفر ملک۔ سرکاری ادارہ غاک نجی کوریئر سروس آتے کاریم اٹ ایسورہ، وزیراعظم منظوری ءِ تسنے کہ سرکاری ادارہ غاک داسہ کوریئر کن پوسٹل سروس آتے کاریم اٹ اتیرہ۔ نن یو ایم ایس نا بناءِ کرینن، پارسل آ اسہ اسٹیکر اسے آ نم تینا پارسل نا مانیٹرنگ ءِ کیرے، دا اسہ انقلاب اسے داڑان پاکستان بدلینگک۔
