اسلام آباد۔ 25اپریل (اے پی پی) قومی اسمبلی فاٹا ٹی صوبائی اسمبلی نا گچین کاری تا بابت گچین کاری (ترمیمی) بل 2019ء نا منظوری ءِ تس۔ پنچ شنبے نادے آ پارلیمانی امور نا وزیرعلی محمد خان دا بابت گچین کاری ایکٹ 2017ء ٹی پین ترمیم کننگ نا بل 2019ء ءِ قائمہ کمیٹی نا رپورٹ کروک دروشم اٹ دمدستی سجفنگ اٹ اتنگ نا تحریک اس پیش کرے۔ موکل ملنگ آ او بل ءِ ایوان اٹ پیش کرے۔ ڈپٹی اسپیکر ایوان آن بل انا شق وار منظوری ءِ دوئی کرے۔ علی محمد خان پارے کہ 25می آئینی ترمیم نا رداٹ فاٹا ٹی 25جولائی آ صوبائی اسمبلی نا 16نشست آتیا گچین کاری اڈ ترفنگ المی ءِ۔ الیکشن کمیشن ءِ 6مسکوہی علاقہ غاتا حلقہ بندی تیٹی مشکل آتا مون تروک ءِ ہرافتے صوبائی حکومت ایلو متصل ضلع غاتون ملفینے۔ اوپارے کہ بل اٹی پیدوار کننگانے کہ الیکشن کمیشن قبائلی علاقہ غاتے کن قومی اسمبلی ٹی عام نشست آتا رداٹ حلقہ ہائے گچین کاری نا حلقہ بندی تے کننگ نا وخت آ اِرٹ یا زیات جتا حلقہ غاتے اسہ حلقہ گچین کاری اسے ٹی اوار کننگ کیک۔ ایوان امنائی اٹ بل انا منظوری ءِ تس۔
