اقوام متحدہ۔ 25اپریل (اے پی پی) پاکستان مقبوضہ کشمیر اٹی کشمیری تا حق خودارادیت آن پدریسہ نمنءِ اقوام متحدہ نا چارٹر نا سنگین ءُ خلاف ورزی اس گوندانے، مقبوضہ جموں و کشمیر نا الس نا برخلاف برجا بھارتی گام گیج آک ناانصافی آ مبنی و اقوام متحدہ نا کانود نا خلاف ورزی ءِ۔ اقوام متحدہ نا جنرل اسمبلی نا 193می دیوان اٹی ”ملٹی لیٹرل ازم ڈپلومیسی فار پیس“ انا جہانی دے انا مناسبت اٹ اڈ ہلوک آ دود آن تران کرسا اقوام متحدہ ٹی پاکستان نا سفیر ملیحہ لودھی جہانی برادری آ زور شاغا کہ او اقوام متحدہ نا چارٹر نا خلاف ورزی نا ہر کوشست نا برخلاف یکجا مریر یا او بنداوی حق آتا بابت تینا کانود اٹی بدلی کیر۔ اوداہیت آ زور شاغا کہ ننے مچ آ دنیا ٹی مروک آ انسانی حق آتا خلاف ورزی تا برخلاف ہیت کننگ نا جاگہ غا بایدے عملی گام گیج کین۔ پاکستانی مندوب پارے کہ اقوام متحدہ نا کانود نا رداٹ غٹ خلقت نا بنداوی انسانی حق انا رکھ ننا فرض ءِ۔ اودنیا ٹی جہانی کانود آ عملدرآمد نا حالیت آتے ٹی گچینی تون اوار وتواجہی و اسہ ایلو نا ریاستی حق انا رکھ اتون اوار اوار واک انا کاریم اٹ اتنگ ءِ چٹفنگ نا گرج آ ہم زور شاغا۔ پاکستانی مندوب پارے کہ واک انا کاریم اٹ اتنگ آ گلوبل آرڈر آ عملدرآمد آن جہانی کہول آ کیہی ویل آک ودی مریرہ۔ا وپارے کہ دنیا ترندی اٹ اسہ ایلو تون گنڈنگ انگ ءِ، جہانی کمک المی ءِ، دا بابت ننے تین پہ تینی عزت و شرف و سگ انا قدر آتا قدر ءِ کروئی مریک۔ اوپارے کہ غٹ تر جہانی ویل آتا ایسر جہانی کہول آ زمواری نا احساس اٹی اودیم ءِ۔ اوپارے کہ دنیا نا کیہی بشخ آتے ٹی معاشی نزوری و قومی پرستی نا سوب بھاز انگا خلقت ہجرت کننگ آ بیوس ءُ تانکہ او رکھوک ءُ زند اس تیر کننگ کیر ہرا دا ہیت انا نشانی ءِ کہ جہانی برادری نا بھلو کچ اس ساڑی آ جہانی گام گیج آتا برخلاف ءُ و دادے مسترد کیرہ۔ اوپارے کہ جہانی برادری تین پہ تین اواری اٹ داوڑنا غلط نظریہ غاتا توننگ کن تینا کڑد ءِ ادا کیر۔ اوپارے کہ اقوام متحدہ نا کانود نا رداٹ ننے بنداوی انسانی حق انا رکھ ءِ المی کننگ کن تین پہ تینی اواری اٹ گام گیج کروئی مریک۔ اقوام متحدہ ناچارٹر نا بابت پاکستانی مندوب پارے کہ دا بیرہ جنگ انا برخلاف رکھ و سلامتی نا کانود اف بلکن دا ناانصافی و بیدادی نا برخلاف رکھ تننگ کن اسہ اومیت نا روشنائی اس ہم ارے۔ داوخت آ اقوام متحدہ نا سیکرٹری جنرل انتونیوگوترس پارے کہ ارٹ میکو جنگ عظیم آن پد 75 سال مست جہانی برادری نا کثیر الجہتی گام گیج آتیان کیہی زند آتے رکھ فراوان کننگ تون اوار اوار اقتصادی و راجی شونداری تون اوار انسانی حق انا رکھ ءِ ہم المی کننگانے تانکہ دنیا ٹی بھلو کچ اسے آ پین مسٹ میکو بدامنی اس ودی مف۔ جہانی کانود، صنفی بریبری، چاگڑدی رکھ و خطرناک سلہہ غاتا کاریم اٹ اتنگ ءِ توننگ و خطرناک ناجوڑی تیان بچنگ نا بابت اوپارے کہ کثیر الجہتی و تین پہ تینی سفارتکاری نا رداٹ کروک آ گام گیج آتیان الس نا خذمت نا ریکارڈ نا عکاسی مریک۔
