اسلام آباد۔ 24اپریل (اے پی پی) وزیراعظم نا خصوصی کمکار اطلاعات ونشریات ڈاکٹر فردوس عاشق اعوان پارینے کہ پاکستان تحریک انصاف نا حکومت آجوئی اظہار رائے نا بنداوی آئینی حق آ پورو یخین تخک و اوڑا عمل کننگ ءِ، میڈیا و جمہوریت اسہ ایلو کن المی ءُ، ہڑتوم آک اسہ ایلو نا واک آک ءُ، صحافی تا حق انا رکھ و راجی آسراتی کن غٹ ممکنہ گام گیج کینہ۔ او چارشنبے نادے آ داڑے صدر نیشنل پریس کلب اسلام آباد شکیل قرار نا کماشی ٹی پریس کلب نا ڈل اتون اوڑدہی ٹی گپ و تران کریکہ۔ پی ایف یو جے ورکرز گروپ نا صدر پرویز شوکت ہم ساڑی ئس۔ نمائندہ ڈل خصوصی کمکار ءِ صحافی تے مون تروک ویل آتیان معلومدار کرے۔ داوخت آ وزیراعظم نا خصوصی کمکار ڈاکٹر فردوس عاشق اعوان پارے کہ اہل صحافت تون دیرینہ وابستگی و جندی تعلق ءِ، ملکی فائدہ غاتا رکھ، قومی یکجہتی ءِ مون آ دننگ و ملکی شونداری نا دوئی کننگ کن میڈیا ءِ اہم ءُ شریدار اس سرپند کینہ۔ اوپارے کہ صحافی تا ویل و مشکل آتیان جوانی اٹ بلد اُٹ۔ اوپارے کہ میڈیا ریاست نا اہم ءُ تمبہ اسے و جمہوریت نا محافظ ءُ اودے پین واکدار کینہ۔
