اسلام آباد۔ 24اپریل (اے پی پی) صدر مملکت ڈاکٹر عارف علوی دنیا ٹی مقابلہ کن پوسکن آ و فائدہ تروک آ تعلیم آ پبی چکار کننگ نا گرج ءِ تالان کرسا پارینے کہ پاکستان اٹی روزگار نا وارخواہی تیٹی ودکی کن مارکیٹ نا خواست آتے مون آ تخوئی مریک، پاکستان پوسکن آ ٹیکنالوجی نا پڑاٹی زوت تینا ہند ءِ جوڑ کیک، سیل و سوات نا بشخ ترندی اٹ مون آ ہِننگ ءِ، جامعہ و ایلو تعلیمی ادارہ غاک سیل و سوات ءِ مون آدننگ اٹ تینا گچین کڑد ءِ ادا کیر۔ اوداہیتءِ چارشنبے نادے آ داڑے کامسیٹس یونیورسٹی نا کانووکیشن آن تران کرسا پارے۔ صدر مملکت ڈاکٹر عارف علوی تعلیم و تربیت نا اہمیت ءِ تالان کرسا پارے کہ زند اٹی بایدے دا سمجھنگپ کہ علم بیرہ ادارہ غاک فراوان کیرہ بلکن علم انا فراوانی ٹی لمہ و باوہ نا کڑد ہم بنداوی ءُ اہمیت اس تخک۔ انسان تینا جوان یا خراب کڑد انا سوب آن چاہنگک۔ صدر پارے کہ اول اول اٹ شونداری کن تعلیم و ڈگری نا گرج مریک ولے اوکان پد دوئی کروک آ علم شاید گیرام کے ولے لمہ و باوہ و استاد آک انسان نا ہراوڑاٹ تربیت ءِ کیرہ تو اونا ہمو شخصیت مون آ بریک۔ اوپارے کہ طالب علم آتا تعلیم و تربیت اٹی استاد و لمہ و باوہ نا بھاز بھلو کڑد اسے۔ استاد علم انا ذریعہ مریک، علم کتاب آتیان دوئی مریک ولے استاد دا ہیل ایتک کہ علم ءِ ہمہ دوئی کننگے۔ استاد آک طالب علم نا دماغی نشونماءِ ہم کیرہ۔ صدر مملکت پارے کہ علم انا ہچ ءُ حد اس اف۔ ای تینٹ ہم ہردے کتاب آتے خواننگ نا کوشست کیوہ و محسوس کیوہ کہ کنا دماغ اٹی ساڑی علم بے کچ کچ اٹی ءِ۔ اوپارے کہ انسان نا ذہن اٹی اخس کہ علم بریک تو اوٹی ہموخس ہی انکساری ودی مریک ہراوڑ میوہ تروک آ درخت انا لڑک میوہ غاتیان شیف مریرہ، ہنداوڑ ہرا انسان اخس زیات علم دوئی کیک ہموخس ہی اوٹی انکساری ودک۔ صدر مملکت مصنوعی ذہانت نا بابت پارے کہ دنیا نا کیہی پنی آ کمپنیک دا بشخ اٹی بھاز چاہنداری دوئی کرینو و پاکستان ءِ ہم دانا بھاز گرج ءِ۔ اوپارے کہ مصنوعی ذہانت نا سوب آن خلقت نا گرج آتے پورو کننگ کن لکھ آ خلقت نا گرج ءِ ہرا مصنوعی ذہانت نا فراوانی کن تینا کڑد ءِ ادا کیر ہراڑان ملک شون ہلیک۔ اوپارے کہ داڑان چارمیکو صنعتی انقلاب اٹی پاکستان جہانی مقابلہ ٹی گچین وڑاٹ تینا کڑد ءِ ادا کننگ نا قابل مریک۔ اوپارے کہ پاکستان اسہ ہندن ءُ ملک اسے ہراتینا آزموندہ غاتیان تینٹ ہم ہیل کرے و دنیا ءِ ہم ہیل تسنے۔ اوپارے کہ اگہ نم پیشن نا ملک آہِننگ کپیرے تو پوسکن آ ٹیکنالوجی و کمپیوٹر نا کمک اٹ قومی شونداری ٹی تینا کڑد ءِ ادا کننگ کیرے ولے دا بابت ریاست نا زمواری ءِ کہ کسر تا تعین ءِ آسان کے تانکہ تعلیمی ادارہ غاتا کنڈآن تروک آ تعلیم و تربیت راج انا شونداری و گچینی ٹی کاریم اٹ برے۔ اوپارے کہ دا ہیت انا تعین ءِ کننگ ریاست نا زمواری ءِ کہ او پائے کہ آیا تعلیم راج انا راجی آسراتی کن کاریم اٹ اتنگ انگ ءِ کہ آخا۔ تعلیم و صنعت نا نیام اٹ ہم گرنچی آن راج شون ہلیک۔ صدر پارے کہ علم انا دوئی کننگ آن پد روزگار نا فراوانی بھاز المی ءِ و اگہ نم مارکیٹ نا گرج آتا رداٹ تعلیم و تربیت دوئی کیرے تو نمے روزگار نا فراوانی المی مریک۔ اوپارے کہ داڑے فارغ مروک آ گڑاس طالب علم آتیان کنا ہیت وگپ مسنے ہرافک پاریر کہ اوفتے ملازمت نا پیش کش مسنے ہرا خوشی نا ہیت اسے، اوپارے کہ ورناتے وخت آ روزگار ملنگ شون ہلوک آ و سرسہب راج انا علامت مریک۔ اوپارے کہ یورپ و شون ہلوک ملک آک تینا گرج آتا رداٹ تعلیم ءِ پورو کروک آ طالب علم آتیان بندغ پٹرہ و اوفتے روزگار ایترہ۔ اوپارے کہ کشاری بشخ ننا جی ڈی پی ٹی 50 آن 60 درسد نا حصہ دار ءِ ولے کشاری بشخ انا گریجویٹس آتا کچ بھاز کم ءِ۔ صدر پارے کہ کشاری بشخ انا شونداری و اونا کچ آن حقی فائدہ ہرفنگ کن ننے شعبہ ٹی چاہندارآتا گرج ءِ۔ صدر پارے کہ ننا ملک اٹی سیل و سوات نا بشخ ترندی اٹ شون ہلنگ ءِ و دابابت ننا تعلیمی ادارہ غاتے بایدے مرے کہ او سیل و سوات نا بشخ انا گرج آتا رداٹ تعلیم و تربیت فراوان کیر۔ صدر انتہاپسندی و دہشت گردی نا چٹفنگ نا ذکر ءِ کرسا پارے کہ نن تینا دینی تعلیم و تربیت، آزموندہ و سلہہ بند فوج انا کمکاری آن انتہاپسندی ءِ چٹفین و دہشت گردی نا مون ءِ تورین۔ اوپارے کہ دانا برعکس ننا ہمسایہ ملک انتہاپسندی ءِ مون آ دننگ ءِ۔ صدر پارے کہ نن وخت انا تدینگ انگ تون اوار اوار بھاز گڑا ہیل کرین ولے ننا ہمسایہ ملک دا بابت ہچ اس ہم ہیل کننگ کتنے۔ داکان مست صدر تعلیمی پڑ اٹی نمان سرسہبی دوئی کروک آ طالب علم آتے ٹی ڈگری و اعزاز ہم بشخ وپانٹ کرے۔
