اسلام آباد ۔ 04مئی (اے پی پی) منیجنگ ڈائریکٹر ایسوسی ایٹڈ پریس آف پاکستان (اے پی پی) مسعود ملک پارینے کہ صوبہ غاتے ٹی حوال آتسکان رسینگ نا بل آن لس الس ئِ پبلک سروس آن بابت ادارہ غاتا شونداری و غیر شونداری ڈٹ جات و خڑچ آتیان بابت معلومداری اسکان رسینگ ممکن مننگ کیک، الیکٹرانک و پرنٹ میڈیا کوڈ آف ایتھکس ئِ مون آ تخسا غیر جانبدارانہ رپورٹنگ ئِ باوری جوڑ کیر، صوبہ غاتیان گڈ بنجاہم حوال آتسکان رسینگ بل انا تیاری ٹی اختہ ئِ ہراکہ خوش آئندئِ ، زند انا جتا بشخ آتیان تعلق تخوک آ بندغ آک خاص کر طالب علم آک راج انا ویل آتے سیٹزن جرنلزم نا ذریعہ تالان کننگ کن تینا تینا کڑدئِ اداکیر۔ او چارشنبے آ ایسوسی ایٹڈ پریس آف پاکستان (اے پی پی) ، سسٹین ایبل سوشل ڈویلپمنٹ (ایس ایس ڈی او) و پرسٹن یونیورسٹی نا اواری آن پاکستان اٹی پٹ و پولی صحافت نا بشخ اٹی حوال آتسکان رسینگ کانود نا کاریم اٹ اتنگ نا سرحال آن اڈ ہلوک آ سیمینار آن تران کریکہ ۔ سسٹین ایبل سوشل ڈویلپمنٹ (ایس ایس ڈی او) نا ایگزیکٹو ڈائریکٹر سید کوثر عباس،م نجی میڈیا رڑانا ڈائریکٹر سٹریٹجک معید پیرزادہ ، انفارمیشن کمشنر خیبر پختونخوا عبدالمتین ،پرسٹن یونیورسٹی نا رجسٹرار اللہ اوایو بلوچ آن بیدس گنڈوک آ شار آتا یونیورسٹی تا طالب علم آتا بھلو کچ اس ساڑی ئسک۔ دود آن تران کرسا ایم ڈی اے پی پی مسعود ملک پارے کہ حوال آتسکان رسینگ نا کانود میڈیا نا رپورٹنگ اٹی کم کمکار ثابت مریک۔