اسلام آباد۔ 25جنوری (اے پی پی) کوئٹہ تون اوار بلوچستان نا کیہی شارتیٹی شنزئی پرتیان زند ژند مس، برساتی نالہ غاتیٹی دیر تا بننگ اٹی 8بندغ تپاخت و چندیک ٹھپی مسر۔ نجی ٹی وی چینل نا رداٹ کوئٹہ و بلوچستان نا ایلو شار ژوب، قلات، چمن، بارکھان، موسیٰ خیل، گلستان، سرانان، نوشکی و چاغی ٹی ہورہ وگروک اتون پر و مش تیا برف باری نا چرجوئی برجاہ ئِ ہراڑآن یخ انا شدت اٹی ودکی آن پد خلقت نا مشکل آتیٹی ودکی مسنے۔ برساتی نالہ غاتیٹی دیر تا سوب کیہی علاقہ غاتیٹی دیر بس، مسہ گاڈی ئِ دیر دننگ آن 8بندغ تپاخت و چندیک ٹھپی مسر۔ رکھی گام گیج نا بارواٹی کروک آ بست وبند نا بابت ڈپٹی کمشنر نصیر آباد نصیر خان ناصر نا پاننگ ئِ کہ مشی آ علاقہ غاتیان بروک آ جلابی ریلہ غاتا توننگ کن محکمہ ایری گیشن محکمہ مواصلات و تعمیرات محکمہ لائیو اسٹاک محکمہ جان جوڑی و ریونیو تون اوار غٹ محکمہ غاتے ہائی الرٹ جاری کرسا چھٹی تے منسوخ کننگانے غٹ محکمہ غاتا نیام اٹ رابطہ نا بابت فلڈ کنٹرول روم اس ہم اڈتننگانے ۔ اوپارے کہ کم نسخان و انسانی جان تا رکھ و خلقت ئِ رکھوک ہند آتیا سرکننگ انتظامیہ نا اولین زمواری ئِ، نصیر آباد انتظامیہ پوروی وڑاٹ ہائی الرٹ ئِ، غٹ جلابی ریلہ غاتا رخ ئِ اسہ پلو کننگ کن محکمہ ایری گیشن و محکمہ مواصلات و تعمیرات ئِ بھلو مشینری اس جلابی کسرتیا گدریفنگ نا پارت کننگانے۔ محکمہ موسمیات نا رداٹ پر و برف باری نا چرجوئی بروک آ 24گھنٹہ اسکان برجاہ سلنگ نا گمان ئِ۔
