اسلام آباد۔ 23اپریل (اے پی پی) وزیر خارجہ شاہ محمود قریشی معیشت نا غٹ سیکٹر آتے ٹی جاپانی پوریاگر و کمپنی تے سلہ خلکونے کہ او پاکستان اٹی خصوصی اقتصادی زون تیٹی پرکشش وارخواہی تیان فائدہ ہرفر۔ دفترخارجہ نا ترجمان نا رداٹ اوداہیت ءِ سے شنبے نادے آ ٹوکیو ٹی جاپان نا نائب وزیراعظم و وزیر خزانہ تاروآسو تون اوڑدہی ٹی گپ و تران کرسا پارے۔ وزیر خارجہ نائب وزیراعظم ءِ وزیراعظم عمران خان نا کنڈآن جاپانی حکومت و الس کن نیک است خواہی تا کلہو ءِ سرکرسا جاپانی وزیراعظم ایبے ءِ دورہ پاکستان نا سلہ نا ہم اعادہ ءِ کرے۔ اوڑدہی ٹی ہڑتوم آ کنڈآتا کثیر الجہتی تعلقداری و ہڑتوم آ ملک آتا نیام اٹ چندی بشخ آتے ٹی کمکاری ءِ پین مون آ دننگ آ گپ و تران کننگا۔ داوخت آ ہڑتوم آ راہشونک ڈیہہ ٹی امن و ایمنی نا ساڑی حالیت آتیا ہم گپ و تران مس ہڑتوم آ راہشونک ڈیہہ ٹی امن و سوگوی کن اسیجا کوشست آتے برجاتخنگ نا عزم انا اعادہ پاک جاپان ہڑتوم آ کنڈآتا تعلقداری تا ساڑی آ نوعیت آ است جمی نا درشانی ءِ کریر۔ وزیر خارجہ شاہ محمود قریشی پاکستان نا شونداری شریدارنا حیثیت جاپان نا کڑد انا ستاءِ کرسا پارے کہ پاکستان معیشت نا غٹ سیکٹر آتے ٹی جاپانی پوریا گر آتے بخیر اٹ پاننگ کن تیار ءِ ۔ اوجاپانی کمپنی تے سلہ خلک کہ او پاکستان اٹی خصوصی اقتصادی زون تیٹی وارخواہی تیان فائدہ ہرفر۔ جاپانی نائب وزیراعظم پارے کہ ہڑتوم آ ملک آتا نیام اٹ تین پہ تینی کمکاری ءِ پین سوگو کننگ کن بے پناہ وارخواہی ارے۔ اوپاکستان تون واپار و زرکاری ٹی ودکی نا تسلسل ءِ برجاتخنگ کن پورو باوری کرفے۔
