ٹوکیو۔ 23اپریل (اے پی پی) وزیر خارجہ شاہ محمود قریشی پارینے کہ پاکستان اٹی واپار و زرکاری نا بھلو وارخواہی اس ارے و جاپانی کمپنیک آئی ٹی ، چنکا و نیامی کہول انا صنعت و کشت وکشار تون اوار چندی بشخ آتے ٹی زرکاری کننگ کیرہ۔ داہیت ءِ او چیئرمین جاپان پاکستان بزنس کوآپریشن کمیٹی نا کنڈآن ٹوکیو ٹی تینا شرف اٹی تروک آ دے انا اِرغ نا وخت آ پارے۔ وزیر خارجہ شاہ محمود قریشی پارے کہ پاکستان اٹی ساڑی آ حکومت امن و سوگوی ، جوڑ جاڑ و شونداری و السی آسراتی ءِ مون آ تخسا ، اقتصادی شونداری نا ایجنڈا غا عمل کننگ ءِ، پاکستان اٹی واپار و زرکاری نا بھلو وارخواہی اس ارے۔ جاپانی کمپنیک آئی ٹی، چنکا و نیامی کہول انا صنعت و کشت وکشار تون اوار چندی بشخ آتے ٹی زرکاری کننگ کیرہ۔ مخدوم شاہ محمود قریشی پارے کہ نن جاپان نا زرکار آتے سلہ خلینہ کہ او پاکستان اٹی خصوصی اقتصادی زون تیان فائدہ ہرفسا بھلا مارکیٹ آتسکان رسینگ دوئی کیر۔ ہڑتوم آ کڑدہ غاک پاکستان وجاپان نا نیام اٹ ہڑتوم آ کنڈآتا واپاری و اقتصادی تعلقداری تا ساڑی آ وڑآ است جمی نا درشانی ءِ کریر۔
