اسلام آباد۔ 23 اپریل (اے پی پی) بنجائی وزیر انسانی حق ڈاکٹر شیریں مزاری پارینے کہ ڈیہہ آن دہشت گردی نا چٹفنگ کن ایران تون سیم انا ہڑتوم آ کنڈ دہشت گرد آتا چٹفنگ نا ہیت مسنے، وزیراعظم ایران اٹی چندی پڑک آتا دہشت گردی تون اوار اوار مکران کوسٹل ہائی وے آ 14پاکستانی تا خون اٹی ایران نا گل زمین ءِ کاریم اٹ اتنگ نا ہم ہیت ءِ کرے، راستکی تے لتاڑنگپ۔ سے شنبے نادے آ قومی اسمبلی ٹی مسلم لیگ (ن) نا باسک خرم دستگیر خان اعتراضی ٹک آ پارے کہ پاکستان ءِ دہشت گرد ملک اس گوندنگ نا بابت سازش مننگ ءِ۔ وزیراعظم ایوان آبرے و وضاحت کے، اونا ورندی ٹی ڈاکٹر شیریں مزاری پارے کہ وزیراعظم جرمنی و فرانس نا ہیت ءِ کننگ خوائسکہ ولے اونا دُوی آن جاپان پیش تما۔ وزیراعظم ایران اٹی ہرا ہیت ءِ کرے اودے ہمورداٹ ہلنگے۔ وزیراعظم داہم پارے کہ مکران کوسٹل ہائی وے آ 14پاکستانی تا خون اٹی ایران نا گل زمین ءِ کاریم اٹ اتنگا۔ اوپارے کہ داکان مست تدوک آ حکومت آک ایران ءِ پاکستان نا گل زمین آ رسائی تسر، تاریخ ءِ است آن دننگ مفک، اگہ دہشت گردی ءِ چٹفوئی ءِ تو سیم انا ہڑتوم آ کنڈآن دہشت گردی ءِ چٹفوئی مریک۔ اوپارے کہ داڑے مودی نا ہیت ءِ کننگاتو تدوک آ حکومت اودے بِننگ کن دہلی آ ہنا وخت اس کہ اونا نیشنل سیکورٹی ایڈوائزر ءِ مری آ بٹنگ انگا۔ اوپارے کہ مودی ءِ مسکوہی وزیراعظم تینا اُراغا بٹنگا، دُن ءُ ہیت کروک آک اول تینا زنچک اٹ ہلیر اریر۔
