گیس دُزی و لین لاسز ءِ اسُل سگپنہ، گیس انا دُزی ءِ توننگ کن بلاتاخیر خصوصی ٹاسک فورس اس جوڑ کننگے، بنجائی وزیر توانائی عمر ایوب خان نا وزارت پٹرولیم اٹی بڑزکو آفیسر آتا بریفنگ اٹی گپ و تران

اسلام آباد۔ 23اپریل (اے پی پی) بنجائی وزیر توانائی عمر ایوب خان پارینے کہ گیس دُزی و لین لاسز ءُ اسُل سگپنہ، گیس دُزی نا توننگ کن بلاتاخیر خصوصی ٹاسک فورس اس جوڑ کننگے۔ داخیال آتا درشانی ءِ او سے شنبے نادے آ وزارت پٹرولیم اٹی بڑزکو آفیسر آتا بریفنگ اٹی کرے۔ داوخت آ وزیراعظم نا خصوصی کمکار توانائی ندیم بابر ہم ساڑی ئس۔ بنجائی سیکرٹری پٹرولیم اسد حیاء الدین وزیر توانائی ءِ وزارت پٹرولیم نا سرجز و ذیلی ادارہ غاتا کارکڑد نا بابت سرجم حوال تس و اودے تیل و گیس انا پٹنگ و پیدوار نا جاری ڈٹ، ایل این جی سپلائی معاہدہ، پٹرولیم مصنوعات آتا کھپت ، ساڑی آ ریفائنری ، ہندی پیدواری لائخی تون اوار ایلو معاملہ غاتا بابت معلومدار کرے۔ وزیر توانائی پارے کہ گیس دُزی نا توننگ کن بلاتاخیر خصوصی ٹاسک فورس اس جوڑ کننگے۔ ٹاسک فورس ہڑتوم آ گیس کمپنی تیان ہردے نا بنداو آ رپورٹ ءِ بٹنگے۔ قومی میرات آتا رکھ سوئی نادرن و سوئی سدرن نا اولی زمواری ءِ۔ وزیراعظم نا خصوصی کمکار پٹرولیم ندیم بابر داوخت آ پارے کہ انتظامیہ لین لاسز اٹی کمتی کن کمر بستہ مریر ، داکان بیدس گیس و تیل انا پین بلاک آفر کننگک۔ داکان بیدس اوجی ڈی سی ایل و پی پی ایل نا ڈرلنگ سرجز آتے ودفنگک۔