چائنا پاکستان اقتصادی راہداری سمندری و ڈغاری واپار نا عظیم ءُ ڈٹ اسے دانا پوروی آن مچ آ ڈیہہ ٹی غیر معمولی و معاشی و واپاری بدلی اس رونما مریک، گورنر بلوچستان امان اللہ خان یاسین زئی

کوئٹہ۔ 23اپریل (اے پی پی) گورنر بلوچستان امان اللہ خان یاسین زئی پارینے کہ چائنا پاکستان اقتصادی راہداری سمندری و ڈغاری واپار نا عظیم ءُ ڈٹ اسے و دانا پوروی آن ڈیہہ ٹی غیر معمولی و معاشی و واپاری بدلی اس رونما مریک ، ساڑی بنجائی و صوبائی حکومت آک نئے بیرہ سی پیک نا اہمیت و فائدہ غاتیان جوانی اٹ بلد ءُ بلکن سی پیک کون آ میگا پروجیکٹ نا رداٹ کیہی شونداری ڈٹ آتیا خصوصی چکار کرینو، مچ آ صوبہ نا ورناتے پوسکن آ فنی و تکنیکی مہارت ہیل تننگ کن ہم پبی گام گیج چست کننگ انگ ءِ، داخیال آتا درشانی ءِ او ایئر وار کالج نا بشخ ہلوک آتیان گپ و تران کرسا کرے، پاکستان نیوی نا ریئر ایڈمرل نوید احمد رضوی کوئٹہ نا مطالعاتی دورہ غا بروک آ زیر تربیت آفیسر آتا کماشی ءِ کریکہ، نیوی نا آفیسر آک صوبہ ٹی امن و ایمنی نا حالیت ، سیل و سوات ءِ مون آ دننگ، افرادی واک انا تربیت و دہشت گردی نا چٹفنگ و صوبائی حکومت نا شونداری ڈٹ آتا بابت کیہی سوج کریر ہرافتا گورنر بلوچستان سرجمی اٹ ورندی ءِ تس ، اسہ سوج اسے نا ورندی ٹی گورنر بلوچستان پارے کہ امن مچ آ ڈیہہ نا بنداوی گرج ءِ کانود نافذ کروک آ ادارہ غاتا خذمت و قربانی تا سوب آن مچ آ صوبہ نا جم اٹنگا حالیت آتے ٹی نمان گچینی بسنے و الس نا جان و مال انا رکھ ءِ المی کننگ نا گمان آک روشنا مننگ ءُ۔ اوپارے کہ داٹی ہچ ءُ شک اس اف کہ صوبہ نا شونداری کن بڑزکو تعلیم ءِ مون آ دننگ ءِ اہمیت تسونن، ایسر اٹی گورنر بلوچستان و مہمان تا نیام اٹ یات گاری شیلڈ اسہ ایلو ءِ ہم تننگا۔