اسلام آباد۔ 22اپریل (اے پی پی) آزاد جموں و کشمیر نا صدر سردار مسعود خان بھارت نا قید اٹی کشمیری حریت پسند راہشون یاسین ملک نا ناجوڑی آ گڑتی نا درشانی ءِ کرسا بھارتی حکومت آن اونا دمستی یلہ کننگ و اودے ہلہلئی بنداو آ درمان نا آسراتی تننگ آن بیدس اودے اونا اُرائی و چناتے تون اوڑدہی نا موکل تننگ نا خواست کرینے۔ دوشنبے نادے آ کشمیر ہاؤس اسلام آباد آن جاری مروک آ اسہ بیان اسے ٹی صدر آزاد کشمیر پارے کہ بھارت نا نیشنل انوسٹی گیشن ایجنسی اسہ دروغ و من گھڑت مقدمہ سے ٹی حریت راہشون ءِ دزگیر کرسا بدنام زمانہ تہاڑ جیل آ گدریفے ہراڑے اودے اونا خاہوت نا بندغ آتون ملنگ نا ہم موکل اف۔ اوپارے کہ بھارت نا دا گام گیج جہانی کانود و بھارت نا جند انا کانود نا ہم سنگین خلاف ورزی ءِ ہرانا اخس کہ مذمت ءِ کننگے او کم ءِ۔ اوپارے کہ بھارتی حکومت ظالمانہ و منفی چم بازی اختیار کرسا آجوئی و حق خودارادیت کن کشمیری الس نا توار ءِ توننگ خواہک ہراٹی او وخت اس ہم سرسہب مفک انتئے کہ کشمیریک غٹ تر ظلم آن پدہم تحریک آجوئی ءِ سرسہبی اسکان برجاتخنگ نا ارادہ ءِ کرینو۔ صدر آزاد کشمیر پارے کہ نن اقوام متحدہ ، اسلامی کمکار تنظیم و مچ آ دنیا نا حق انسانی نا تنظیم آتیان ہم خواست کینہ او نیام تمسا یاسین ملک و ایلو حریت پسند راہشون و سیاسی کارندہ غاتا یلہ کننگ و اوفتے درمان نا بنداوی حق ترفنگ کن تینا کڑد ءِ ادا کیر۔ صدر سردار مسعود خان بھارت حکومت ناکنڈآن آزاد کشمیر و بھارتی مقبوضہ کشمیر نا نیام اٹ جاری کراس ایل او سی واپارءِ اسہ کنڈی وڑاٹ معطل کننگ نا گام گیج آتیا ہم سخت گڑتی نا درشانی ءِ کرسا ہڑتوم آ ڈیہہ تا نیام اٹ واپاری سرجزآتے دُوارہ بحال کننگ نا خواست ءِ کرے۔ داکان مست پاکستان نا انسانی حق و شاری آجوئی تا علمبردار انصار برنی تون گپ و تران کرسا صدرآزاد کشمیر مقبوضہ کشمیر اٹی پاکستان و آزاد کشمیر نا چندی ڈیہہ تیان مقبوضہ کشمیر نا ورناتتون برام کرسا ہنوک آ زالبول آتے شہریت تننگ آن انکار کننگ نا بھارتی حکومت نا گام گیج آ ہم شدید گڑتی نا درشانی ءِ کرسا بھارتی حکومت آن خواست کرے کہ یاتو دا زالبول آتے مقبوضہ کشمیر نا کانود نا رداٹ شاری حق تننگے یا اوفتے المی سفری دستاویز تننگے تانکہ او آزاد کشمیر و پاکستان اٹی تینا لمہ و باوہ، سیال و قریب و خاہوت نا ایلو بندغ آتون بے روک ٹوک ملنگ کیر۔ صدرآزاد کشمیر داہم خواست کرے کہ بھارت مقبوضہ کشمیر اٹی فی الفور فوجی آپریشن ءِ بند کرسا کشمیر نا ویل ءِ سیاسی، سفارتی و کشمیری الس نا است خواہی تا رداٹ ایسر کننگ کن پاکستان و کشمیری الس تون گپ و تران و مذاکرات نا عمل نا بناءِ کے تانکہ دا دیرینہ ویل انا پائیدار و عمل نا قابل ءُ ایسری اس پٹنگ مرے۔
