بلوچستان نا برف باری و پرتیان زہمی ضلع غاتیٹی امدادی سرجزآک برجاہ ئُ، وزیراعلیٰ بلوچستان نواب ثناءاللہ خان زہری زہمی تا دمدستی امداد کن ہڑدڑی فنڈ اس جاری کرینے، پی ڈی ایم اے و محکمہ داخلہ نا صوبائی وزیر میر سرفراز بگٹی نا”اے پی پی“ تون ہیت وگپ
کوئٹہ۔ 25جنوری (اے پی پی) پی ڈی ایم اے و محکمہ داخلہ نا صوبائی وزیر میر سرفراز بگٹی پارینے کہ بلوچستان نا برف باری و پرتیان زہمی ضلع غاتیٹی امدادی سرجزآک برجاہ ئُ، موسمی حالیت نا سوب امدادی سرجزآتا تسلسل ئِ برقرار تخنگ اٹی مشکل آتا مون تروک ضرور ارے ولے پی ڈی ایم اے و ضلعی انتظامیہ پورو مستعدی اتون زہمی علاقہ غاتیٹی کاریم کننگ ئُ۔ داخیال آتا درشانی ئِ او ”اے پی پی“ تون ہیت وگپ کرسا کرے۔ پی ڈی ایم اے نا صوبائی وزیر پارے کہ موسمی حالیت آتا رداٹ صوبائی حکومت ہندا ہفتہ الس ئِ حد اسسکان سفر کننگ آن پاناد کننگ نا سلاہ تسنے انتئے کہ برف باری و ندی نالہ غاتیٹی طغیانی نا سوب شاہراہ تا اناگت بندش مننگ کیک، اوپارے کہ وزیراعلیٰ بلوچستان نواب ثناءاللہ خان زہری زہمی تا دمدستی امداد کن ہڑدڑی فنڈ جاری کرینے وخت اس کہ حسب ضرورت پین فنڈ انا فراوانی نا یخین دہانی ہم کرفینے پی ڈی ایم اے تینا بھلو مشینری اس ضلعی انتظامیہ نا صوابدیدہ غا تسنے وخت اس کہ راشن، کمبل و کنوئی ئُ گڑا زہمی علاقہ غاتیٹی تسلسل اتون گدریفنگ انگ ئِ، پی ڈی ایم اے نا غٹ عملہ نا چھٹی تے منسوخ کرسا ہفتہ و اتوار نا دے ہم کاریم کننگ انگ ئِ حالیت نا چاروکی کن خصوصی مانیٹرنگ سیل اس ہم اڈتننگانے و غٹ حالیت آتابابت وزیراعلیٰ بلوچستان ئِ ہرگھنٹہ ٹی رپورٹ تننگ انگ ئِ پی ڈی ایم اے نا صوبائی وزیر پارے کہ اولیکو مرحلہ ٹی بنائی ریلیف نا فراوانی برجاہ ئِ وخت اس کہ ارٹ میکو مرحلہ ٹی نسخان تا تخمینہ ئِ خلسا زہمی تا امداد کن گام گیج ہرفنگک۔ اوپارے کہ مشکل نا دا ساہت اٹی الس ئِ تنیا الیپنہ و زہمی تا پورو بحالی اسکان آرام اٹ تولپنہ۔
