اسلام آباد۔ 19اپریل (اے پی پی) وزیر مملکت موسمیاتی بدلی زرتاج گل پارینے کہ وزیراعظم عمران خان ءِ پورو اختیا ر دوئی ءِ اوہرکس ءِ چائے تینا کابینہ نا بشخ کے، ننے اونا فیصلہ غاتیا پورو پت ءِ، موسمیاتی بدلی نا سوب آن پِرتا نظام بدل مسنے ولے ننا بزغرآک ہم بشام نا پِرتے خنسا بیجائی کیرہ۔ داخیال آتا درشانی ءِ او جمعہ نادے آ اسلام آباد وائلڈ لائف مینجمنٹ بورڈ اٹی کوکا کولاکمپنی و ایس ایم ای سی آئل کمپنی نا کنڈآن مارگلہ ہلز نیشنل پارک اٹی سفائی مہم نا وخت آ دود آن تران کرسا کرے۔ وزیر مملکت پارے کہ سیل و سوات ءِ مون آ دننگ کن ساف ستھرا پاکستان لازم ءِ تانکہ سیل و سواتی تا مون آ پاکستان نا گچین دروشم ءِ تالان کننگ مرے، کلین اینڈ گرین پاکستان ڈٹ رویہ غاتے ٹی بدلی نا اسہ مہم اسے ہرانا کمک اٹ الس اٹ دا شعور ءِ ودی کروئی ءِ کہ او تینا دامون ایمون نا چاگڑد ءِ ساف ستھرا کرسا قومی فرض ءِ پورو کیر۔ اوپارے کہ دامہم نا سیاست تون ہچ ءُ تعلق اس اف بلکن دانامسخت بیرہ پاکستان ءِ زیبا جوڑ کننگ نا ءِ۔ اوپارے کہ بنجائی دارالحکومت ءِ ساف ستھرا کننگ کن اسلام آباد وائلڈ لائف مینجمنٹ بورڈ ءِ کوکاکولا کمپنی و ایس ایم ای سی آئل کمپنی اہم ءُ کڑد اس ادا کننگ ءُ و مارگلہ ہلز انا ٹریلز ءِ ساف ستھرا تخنگ ننا غٹ انا زمواری ءِ۔ اوپارے کہ نن وونٹ ہلسا اقتدار اٹی بسونن و ملک و قوم انا گچینی ننا اولیت ءِ۔ اوپارے کہ قوم چاہک کہ ملک ءِ تنکی آن کشنگ نا لائخی بیرہ عمران خان تون ءِ و اوقوم ءِ مایوس کپک۔ اوپارے کہ موسمیاتی بدلی نا سوب پِرتا نظام بدل مسنے ولے ننا بزغرآک اینو ہم بشام نا پِرتے خنسا بیجائی کیرہ اوفتے تینا روایتی دسنگ نا وڑ ءِ ہلسا موسمیاتی بدلی ءِ ہرسا فصل آتے بایدے دسر، وننے اوفتے دا آگاہی تروئی مریک او ہندن ءُ بج خلیر ہراٹی موسمیاتی سگ انا لائخی زیات مرے۔ داوخت آ کوکا کولا کمپنی نا ملازم آک پڑک آتا دروشم اٹ مارگلہ ہلز نیشنل پارک انا سفائی ءِ کریر و بھلو کچ اسے ٹی کچرہ تے ہرفیر۔
