اسلام آباد۔ 19اپریل (اے پی پی) بنجائی وزیر تعلیم و کسبی تربیت شفقت محمود پارینے کہ غٹ پاکستانی تے مون آ ہِننگ نا بریبر وارخواہی فراوان کننگ ءِ المی کننگ کن اسہ وڑنا نصاب تعلیم ننا اولیت ءِ، تعلیم نا آب ءِ گچین کننگ اٹ غٹ ءِ تینا بشخ ءِ شاغوئی مریک۔ او جمعہ نادے آ پاکستان سمٹ نا بنائی سیشن آن تران کریکہ۔ اوپارے کہ خوشی مریک کہ پاکستان اٹی تعلیم اٹی گچینی بننگ ءِ ، بھاز انگا کاریم تے داسکان تعلیم نا پڑاٹ کروئی ءِ و چندی چیلنج آتا مون تروک ءِ، تعلیم ءِ گچین کننگ کن غٹ ءِ تینا بشخ ءِ شاغوئی مریک۔ اوپارے کہ حکومتی کہول آ بیرہ ہیت آخا بلکن کاریم کننگ نا گرج مریک ، ملک و قوم انا شونداری کن تعلیم آ کاریم کننگ ناگر ج ءِ ۔ اوپارے کہ پاکستان اٹی خواندگی نا کچ 58 درسد ءِ ، اسکول آتیا ہِننگ نا وئی نا 2کروڑ چنااسکول آتیان پیشن ءُ۔ اوپارے کہ داچناتے اسکول آتے ٹی داخل کرفنگ اسہ بھلو چیلنج اسے ہراڑکن حکومت کاریم کننگ ءِ۔ اوپارے کہ حکومت تعلیم نا آب ءِ گچین کننگ کن کاریم کننگ ءِ، نن انت کہ پانہ اودے کرسا نشان ہم ایتنہ، ننے ملک انا ترند رفتار شونداری ءِ المی کننگ کن تعلیم نا آب آن ہلسا چناتے کسب ہیل تننگ اسکان کاریم کروئی ءِ۔ اوپارے کہ تعلیم نا بشخ اٹی ننے چندی چیلنج آتا مون تروک ءِ ولے کرار کرار آ داویل آتا مون ءِ تورنہ۔ اوپارے کہ 18می ترمیم آن پد تعلیم داسہ صوبائی معاملہ اسے ولے بنجا تینا زمواری تیان بے پرواہ مننگ کپک و او تعلیم نا بشخ اٹی صوبائی کہول آ کاریم کننگ ءِ۔ اوپارے کہ نن دا سوب آتے ہُننگ نا کوشست کننگ اُن کہ لمہ و باوہ تینا چناتے اسکول آتیا انت اکن گدریفپسہ تانکہ دا سوب آتے چٹفسا ملک اٹی خواندگی نا کچ ءِ گچین جوڑ کننگ مرے۔ اوپارے کہ بنجائی دارالحکومت اٹی مئی نا ایسر اٹی اسکول آتیان پیشن چناتا داخلہ ءِ المی کننگک۔ اوپارے کہ زالبول آتا تعلیم آ پبی چکار کننگ خوانہ، خوانہ کہ ملک انا مسنک ہم تعلیم دوئی کیر۔ اوپارے کہ ٹیکنالوجی آ ہم چکار کننگ انگ ءِ تانکہ تعلیم نا آب ءِ ایلو ملک آتا تعلیم نا بریبر اتنگ مرے۔ اوپارے کہ کلاس روم لرننگ ءِ گچین کننگ کن کاریم کننگ اُن ہراڑان چناک جوان ءُ تعلیم اس دوئی کننگ کیرہ۔ اوپارے کہ بامسخت تعلیم ءِ مون آ دننگ آ کاریم مننگ ءِ تانکہ تعلیم دوئی کننگ آن پد روزگار ءِ المی جوڑ کننگ مرے، داوخت آ ننا داحال ءِ کہ پی ایچ ڈی نا کہول آ تعلیم دوئی کننگ آن پد ہم خلقت ءِ نوکری ملیپننگ ءِ ، نن دا غٹ سوب آتے چٹفنگ اُن و جاب مارکیٹ نا طلب نا رداٹ تعلیمی نظام ءِ اتنگ انگ ءِ۔
