اسلام آباد۔ 19اپریل (اے پی پی) زرکاری بورڈ انا چیئرمین ہارون شریف پارینے کہ بنداوی پنجر نا شونداری و سوگوی ٹی زرکارآک پاکستان نا پلو ءِ ہلنگ ءُ، پاکستان ہندی و درملکی زرکارآتے کن است چکوک ءُ مارکیٹ اسے ہرا دے ٹکی نیامی و دیکی چین نا کنڈاتالان مننگ ءِ۔ برطانیہ پاکستان ایوان صنعت و واپار(یوکے پی سی سی آئی) نا ڈل اتون گپ و تران کرسا اوپارے کہ ملک اٹی کاروباری اصلاحات و زرکاری ءِ مون آ دننگ وزیراعظم عمران خان نا اولیت آتے ٹی اوار ءِ ہراٹی درملکی زرکارآک پاکستان نا معیشت نا چندی بشخ آتے ٹی زرکاری ٹی است خواہی نا درشانی ءِ کننگءُ۔ اوپارے کہ زرکاری بورڈ برطانیہ تون اوار ایلو ملک آتا سفارت خانہ و ہائی کمشنر آتون رابطہ کننگ ءِ تانکہ زرکاری ٹی است خواہی تخوک آ زرکارآتے کن آسراتی تا فراوانی ءِ المی جوڑ کننگ مرے۔ اوپارے کہ پاکستان نا سیل و سوات اٹی زرکاری نا بھلو گمان اس ساڑی ءِ۔ اوپارے کہ وزیراعظم سمندر پار رہینگوک آ پاکستانی تا کمک اٹ ملک انا خلقی علاقہ و سیل و سواتی ہند آتا شونداری ٹی بھاز است خواہی تخک۔ ڈل انا باسک آک سیل و سوات، آئی ٹی، ہاؤسنگ ، فوڈ پراسیسنگ تون اوار ایلو بشخ آتے ٹی زرکاری ٹی است خواہی نا درشانی ءِ کریر۔
