اسلام آباد۔ 19اپریل (اے پی پی) اسپیکر قومی اسمبلی اسد قیصر پارینے کہ پاکستان تیونس تون مذہب، تاریخ و دودوربیدگ نا رشتہ غاتے ٹی تفوک ءِ، پاکستان تیونس تون دوستانہ تعلقداری تے بھاز اہمیت ایتک۔ اوداہیت ءِ جمعہ نادے آ داڑے پاکستان اٹی تیونس نا سفیر عادل العربی تون اوڑدہی ٹی گپ و تران کرسا کرے۔ اوڑدہی ٹی ہڑتوم آ ملک آتا نیام اٹ ہڑتوم آ کنڈآتا تعلقداری تون اوار اہم علاقائی و جہانی معاملہ غاتیا گپ و تران کننگا۔ اسپیکر قومی اسمبلی اسد قیصر اودے پارینے کہ پاکستان و تیونس نا نیام اٹ دیرینہ برادرانہ تعلقداریک ءُ و پاکستان تیونس تون دوستانہ تینا تعلقداری تے بھاز اہمیت ایتک۔ اوپارے کہ پاکستان تیونس تون تینا تعلقداری تے اقتصادی کمک و السی کہول آ رابطہ غاتے مون آدرسا ودفنگ نا است خواہ ءِ، ہڑتوم آ ملک آتا نیام اٹ واپار، سیل و سوات و زرکاری ءِ مون آدننگ نا بھلو وارخواہی اس ساڑی ارے۔ اسپیکر پارے کہ پاکستان نا ساڑی حکومت ملک اٹی زرکاردوست پالیسی درستی راستی کرفنگ ءِ ہرافتیان تیونس نا زرکارآک فائدہ ہرفنگ کیرہ ، پارلیمانی سفارتکاری ہڑتوم آ برادر اسلامی ملک آتے خڑک اتنگ اٹ اہم ءُ کڑد اس ادا کننگ کیک ، فائدہ ہرفنگ و اسہ ایلو ءِ پہہ مننگ نا وارخواہی دوئی مریک۔ تیونس نا سفیر عادل العربی داوخت آ پارے کہ پاکستان ڈیہہ نا اہم ءُ ملک اسے ، و تیونس پاکستان تون تینا تعلقداری تے قدر انا نظر اٹ ہرک۔ اوپارے کہ تیونس قطبی افریقہ نا گیٹ وے ءِ۔ پاکستان تیونس نا کمک اٹ افریقی منڈی تسکان رسینگ دوئی کننگ کیک، تیونس نا حکومت پاکستان تون راجی و اقتصادی بشخ آتے ٹی کمکاری ءِ مون آ دننگ نا است خواہ ءِ۔ اوپارے کہ تیونس پاکستان نا جہانی و ڈیہہ نا امن کن کروک آ گام گیج آتے قدر انا نظر اٹ ہرک۔
