اسلام آباد۔ 19اپریل (اے پی پی) بنجائی وزیر ریلوے شیخ رشید احمد پارینے کہ وزیراعظم پاکستان نا ہندا تُو اٹی چین نا دورہ بے کچ اہم ءِ ، سی پیک ڈٹ آتیا خاطر خواہ پیش رفت مریک، پاکستان و چین نا نیام اٹ لائن ون ریل ڈٹ آتا بنائی ڈیزین آ دستخط مریک۔ داخیال آتا درشانی ءِ جمعہ نا دے آ چین نا صوبہ ہوبے نا وائس گورنر ہوانگ چوپنگ تون وزارت ریلوے ٹی اوڑدہی ٹی کرے۔ پاکستان و چین نا نیام اٹ تین پہ تینی دیرینہ تعلقداری و صوبہ ہوبے نا بابت اقتصادی و دودوربیدگی تعلقداری تا مون آ دننگ آ گپ و تران کننگا۔ داوخت آ شیخ رشید پارے کہ پشاور۔ کراچی ایم ایل ون ڈٹ انا پوروی آن پاکستان اٹی ریل انا انقلاب بریک۔ شیخ رشید ہوبے نا صوبائی حکومت ءِ گوادر، کوئٹہ ، تفتان ایم ایل ٹوریل ڈٹ اٹی شریداری و زرکاری نا سلہ خلک۔ وائس گورنر وزیر ریلوے شیخ رشید احمد ءِ ہوبے صوبہ نا دورہ نا خصوصی سلہ خلک ہراڑا وزیر ریلوے نا کنڈآن وائس گورنر ہوانگ چوپنگ نا وزارت ریلوے نا دورہ ءِ کننگ نا منت واری ءِ ہرفے و دورہ نا سلہ ءِ امنا کرے۔ داوخت آ ہوبے صوبہ نا وائس گورنر ہوانگ چوپنگ پارینے کہ پاکستان آ بسٹ ہندن لگا دُن کہ تینا قریب ءُ ایلم اسے نا اُراغا بسونٹ، پاکستان نا خلقت نا چین اکن مہر و مریبت آ اوفتا منت واراُٹ۔ ہوبے نا صوبائی حکومت پاکستان ریلوے تون شریداری ٹی است خواہی تخک۔ ننا کچ آن پاکستان ریلوے ءِ پوسکن آ لین تیا تالان کننگ مریک۔ وائس گورنر پارے کہ سی پیک ڈٹ آتیان پاکستان و چین نا تین پہ تینی تعلقداری تیٹی اسہ پوسکن و روشن ءُ دوراسے نا بنامسنے و دادے پین مون آ دینہ۔
