اسلام آباد۔ 19اپریل (اے پی پی) صدر مملکت ڈاکٹر عارف علوی پارینے کہ ملک انا راجی و اقتصادی شونداری و نیزگاری نا چٹفنگ کن انفارمیشن ٹیکنالوجی نا پڑاٹ پٹ وپول بھاز المی ءِ، حکومت آئی ٹی نا بشخ انا لائخی و اہمیت آن جوان واقف ءِ و اودے قومی اولیت کننگانے۔ اوداہیت ءِ وزیراعظم نا ٹاسک فورس آئی ٹی وٹیلی کام نا کنڈآن جمعہ نادے آ ایوان صدر اٹی تروک آ بریفنگ اٹی پارے۔ بنجائی وزیر انفارمیشن ٹیکنالوجی و ٹیلی کام ڈاکٹرخالد مقبول صدیقی ہم داوخت آ ساڑی ئس۔ صدر پارے کہ چارمیکو صنعتی انقلاب ننا زند انا وڑءِ بدل کننگ ءِ ۔ اوداہیت آ زور شاغا کہ پوسکن آ ٹیکنالوجی تیان مثبت بدلی رونما مننگ ءِ۔ پوسکن آ ٹیکنالوجی نا خواست آتے پورو کننگ کن پوسکن آ گام گیج آتا گرج ءِ۔ صدر داہیت آ ہم زور شاغا کہ ٹاسک فورس انا بنداوی مسخت ساڑی آ آئی ٹی و ٹیلی کام پنجر نا جاچ و اوٹی گچینی نا سلاہ و سوج آتے پیش کرسا نیزگاری ٹی کمتی و کاروبار ءِ ودفوئی ءِ۔ اوٹاسک فورس ءِ تروک آ مینڈیٹ نا پوروی کن تینا ہروڑنا کمک نا باوری کرفینے۔
