وزیراعظم عمران خان نا پاکستان کرکٹ ٹیم و پی سی بی انتظامیہ تون گپ و تران

اسلام آباد۔ 19اپریل (اے پی پی) وزیراعظم عمران خان پاکستان کرکٹ ٹیم نا ورلڈ کپ اٹی سرسہبی کن نیک است خواہی تا درشانی ءِ کرسا پارینے کہ کٹنگ نا پبی جوزہ، پورو ڈٹ بندی و ٹیم سپرٹ سرسہبی نا دوئی کننگ اٹ کلیدی ءُ کڑد اس ادا کیک، مچ آ قوم انا دعاک ٹیم اتون تفوک ءُ۔ اوداہیت ءِ پاکستان کرکٹ ٹیم و پی سی بی انتظامیہ تون گپ و تران کرسا پارے ہرافک جمعہ نادے آ اوڑتون اوڑدہی کریر۔ اسہ گھنٹہ سے آن زیات نا نشست اٹی وزیراعظم پاکستانی کرکٹ ٹیم انا باسک آتون تینا آزموندہ غاتے شیئر کرے و رلڈ کپ اٹی جوان ءُ گوازی اس پیش کننگ و سرسہبی دوئی کننگ کن جوان ءُ مشورہ تس۔ وزیراعظم نا کنڈآن پاکستانی کرکٹ ٹیم انا ورلڈ کپ اٹی سرسہبی کن است بڈی و نیک است خواہی تا درشانی ءِ کرسا پارے کہ مچ آ قوم انا دعاک اوڑفتے تون ءُ۔ مچ آ دنیا ٹی ملک و قوم انا نمائندگی ءِ کننگ اسہ بھاز بھلو اعزاز اسے۔ وزیراعظم پارے کہ گوازی گرآک قوم انا سفیر ءُ و مچ آ قوم انا خنک و اومیت آک اوفتے تون وابستہ ءُ، تینا لائخی، سپورٹس مین سپرٹ و تینا طرز عمل اٹ پاکستان نا پن ءِ روشن کیر۔ اوپارے کہ چیمپیئن کٹنگ نا پبی جوزہ ءِ ہلسا و پورو ڈٹ بندی اتون میدان اٹ دڑنگرہ۔ وزیراعظم پارے کہ ٹیم سپرٹ سرسہبی نا دوئی کننگ اٹ کلیدی ءُ کڑد اس ادا کیک۔