اورماڑہ نا خڑک آ نادرست بندغ آک مسافر بس آتیان دڑفسا 14بندغ ءِ سم کاری کرسا تپاخت کریر، دہشت گرد عنصر آک اسہ سجفوک ءُ ڈٹ اسے نا رداٹ بلوچستان نا امن وایمنی ءِ خراب کننگ کن چم کننگ ءُ، دوبہ دار آتا دزگیری کن ٹیم اس جوڑ کننگانے، وزیر داخلہ بلوچستان ضیاء لانگو نا صحافی تون گپ و تران
کوئٹہ۔ 18 اپریل (اے پی پی) صوبائی وزیر داخلہ بلوچستان میر ضیاء لانگو مکران اٹی مسافر بس آتیان بے گناہ بندغ آتے کشسا تپاخت کننگ نا واقعہ نا مذمت ءِ کرسا پارینے کہ پولیس و ایلو کانود نافذ کروک آک دوبہ دار آتا دمدستی دزگیری کن غٹ وسیلہ غاتے کاریم اٹ اتیر۔ داہیت ءِ او پنچ شنبے نادے آ داڑے میڈیا تون گپ و تران کرسا پارے۔ اوپارے کہ شرپسند و دہشت گرد عنصر آک اسہ سجفوک ءُ ڈٹ اسے نا رداٹ بلوچستان نا امن و ایمنی ءِ خراب کننگ کن چم کننگ ءُ ہرافتے ہچ ءُ حالیت اسے ٹی بشخنگپک۔ اوپارے کہ اورماڑہ نا خڑک آ نادرست دہشت گردآک مسافر آتا شناختی کارڈ آتے چیک کننگ آن پد 14مسافر آتے شیف دڑفسا سم کاری کرساتپاخت کریر ہرافتا دزگیری کن پولیس و ایلو کانود نافذ کروک آادارہ غاک علاقہ ءِ گھیڑ اٹی ہلکر انشاء اللہ زوت ہی دوبہ دار آتسکان سرمرینہ۔ اسہ سوج اسے نا ورندی ٹی میر ضیاء لانگو پارے کہ الس نا جان و مال انا رکھ حکومت نا زمواری ءِ ہرادے ہرحال اٹ پورو کننگک۔ اسہ پین سوج اسے نا ورندی ٹی اوپارے کہ دوبہ دار آتا دزگیری کن ٹیم اس جوڑ کننگانے و دوبہ دار آتے ہچ ءُ حالیت اسے ٹی بشخنگپک۔
