اسلام آباد۔17اپریل (اے پی پی ) مزن وزیر عمران خان ءَ گشتگ کہ پندل سازاں پروش دیئگ ءُ مدینہ ریاست ءِ ترزءَ ءُ قائداعظم محمد علی جناح ءِ وژن ءِ ردءَ پاکستان ءَ را اسلامی پلاحی ریاست جوڑ کنگ آئیءِ واب اِنت، 8ماہ آنی یکوئی محنت ءُ جدوجہدءَ پد نو پہ لھس مھلوک ءَ ارزانیں لوگ ءِ منصوبہ بندات بوتگ۔ اے حیالانی درشانی آئی ءَ چارشمبے ءِ روچءَ نوکیں پاکستان ہاؤسنگ پروگرام ءِ بنگیجی مراگشءَ گوں تران کنان ءَ کتگ۔ مراگشءَ بنجاہی وزیر ، مزن گسی باسک ، وزارت ہاؤسنگ ، ہاؤسنگ فاؤنڈیشن ءُ دگہ مزنیں حکام ءَ ابید لھس مھلوکءِ مزنیں کساسے ہوار بوتگ۔ مزن وزیر عمران خانءَ حزانگءِ بنجاہی وزیر اسدعمر، ہاؤسنگ وزیر طارق بشیر چیمہ، سیکرٹری ہاؤسنگ عمران زیبءُ ڈی جی ہاؤسنگ ءَ را جوانیں منصوبہ جوڑ کنگءَ مراد بات داتگءُ گشتگ کہ مے اے ٹیمءِ محنت اِنت۔ مزن وزیر عمران خان ءَ گشتگ کہ پہ راولپنڈی اسلام آبادءَ 25ہزار، بلوچستان ءَ یک لکھ 20ہزار، آزاد کشمیر 14ہزار یونٹس جوڑ کنگ ءُ دیئگ بنت۔آئی ءَ گشتگ کہ مدینہ ءِ ریاست ءَ حضورپاکر ﷺ ءَ فیصلہ کتگ کہ یک پلاحی ریاستے جوڑ بیت کہ نیزگار، چوراءُ جنوزام ، بے وسءُ بزگراں حق دیئگ بنت۔ آئیءَ گشتگ کہ اگاں کارے بندات کنگ بیت یکدم ہلاس نہ بیت بلکیں کارءَ جیڑہءُ جنجال ہم دیما کااَنت ، راج گرانیں وہدءَ چہ نہ ترس اَنت ، اے گرانیں وہد راجاں محکم کنگءِ ھاترءَ کااَنت۔
