الس ءِ دمدستی و اڑزان انصاف نا فراوانی حکومت نا اولیت ءِ ، انصاف ہر راج انا بنداوی گرج ءِ
اسلام آباد۔ 17 اپریل (اے پی پی) اسپیکر قومی اسمبلی اسد قیصر پارینے کہ الس ءِ دمدستی و اڑزان انصاف نا فراوانی ساڑی حکومت نا اولیت ءِ ، انصاف ہر راج انا بنداوی گرج ءِ ، انصاف نا عدم فراوانی قوم تا تباہی نا سوب مریک۔ داخیال آتا درشانی ءِ او چارشنبے نادے آ پارلیمنٹ ہاؤس اٹی بنجائی محتسب سید طاہر شہباز تون اوڑدہی ٹی کرے۔ اوڑدہی ٹی ملک اٹی انصاف نا فراوانی تون اوار ایلو معاملہ غاتیا گپ و تران کننگا۔ اوڑدہی ٹی اسد قیصر پارے کہ انصاف نا دوئی کننگ الس نا بنداوی حق اٹی اوار ءِ و دانا دمدستی فراوانی ءِ المی کننگ ریاست نا آئینی زمواری ءِ ، ساڑی حکومت انصاف نا فراوانی ءِ المی کننگ کن غٹ المی گام گیج چست کننگ ءِ۔ اسپیکر قومی اسمبلی پارے کہ بنجائی محتسب نا کنڈآن خذمت آتا فراوانی ٹی پوسکن آ انفارمیشن ٹیکنالوجی نا کاریم اٹ اتنگ ءِ المی کننگے۔ اوپارے کہ الس نا کنڈآن غاوتا ازالہ و اوفتے انصاف نا فراوانی ٹی بنجائی محتسب نا کڑد ستاکڑزک۔ السی غاو تیا دمدستی ایکشن ہلسا اوفتے زوت ایسر کننگے۔ بنجائی محتسب نا کڑد ءِ تالان کننگ کن چندی کانفرنس و سیمینار تا اڈتننگ بے کچ اہمیت تخک۔ اوپارے کہ ملک اٹی انصاف مریک تو شونداری و شونہالی نا پوسکن ءُ کسر ملنگک ، الس اسکان رسینگ اٹی ودکی ءِ المی کننگ کن پرنٹ، الیکٹرانک و سوشل میڈیا نا کاریم اٹ اتنگ وخت انا اہم ءُ گرج اسے۔ اسپیکر قومی اسمبلی بنجائی محتسب ءِ انصاف نا فراوانی نا عمل اٹ تینا ہروڑکمکاری نا باوری کرفے۔ داوخت آ بنجائی محتسب سید طاہر شہباز پارے کہ اسپیکر نا دا است بڈی آ اونا منت وار اُٹ، ننا کوشست ءِ کہ پاکستان نا ہر شاری ءِ دمدستی و اڑزان انصاف فراوان کننگے ۔ اوپارے کہ پوسکن آ انفارمیشن ٹیکنالوجی نا کمک اٹ الس اسکان رسینگ ءِ المی کینہ۔ بنجائی محتسب اسپیکر قومی اسمبلی اسد قیصر ءِ بنجائی محتسب نا سال 2018 ء نا رپورٹ ءِ ہم پیش کرے۔
