اسلام آباد۔ 15اپریل (اے پی پی) صدر مملکت ڈاکٹر عارف علوی پارینے کہ کرتار پور راہداری خیر سگالی و پرامن ہمسائیگی نا استعارہ اسے، پاکستان غٹ ملک و مذہب آتون گچین تعلقداری تا خواہندار ءِ، پاکستان امن خواہک و اودے امن نا قدر و قیمت آن سماءِ، ساڑی آ سال تیٹی اسلاموفوبیا و زینو فوبیا کون آ رجحان آتیان راج اٹی بشخ وپانٹ و خلیج بھلن مسنے۔ اومیت و یخین ءِ کہ غٹ ملک آک اسلاموفوبیا و زینو فوبیا کون آ رجحان آتا چٹفنگ و توننگ کن تینا کڑد ءِ ادا کیرہ، سکھ برادریک امن نا داعی ءُ، پاکستان اقلیت آتا بابت بابائے قوم نا کلہو ءِ اہمیت ایتک ۔ دوشنبے نادے آ داڑے بیساکھی میلہ نا بابت اڈ ہلوک آ دود آن تران کرسا صدر مملکت پارے کہ سکھ برادری نا ایڑھ و ایلم تا بخیر و اوفتا دود اٹی بشخ ہلنگ اوڑکن خوشی نا سوب اسے۔ صدر مملکت مستین خاص کر امریکہ ٹی طالب علمی نا زمانہ ٹی سکھ برادری نا باسک آتون تعلقداری تا خصوصی ذکر ءِ کرے و پارے کہ اونا سکھ برادری نا باسک آتون جوان ءُ سنگتی اس مسنے، اوفتے تون جوان ءُ وخت اس تیر کرینٹ و ای محسوس کرینٹ کہ سکھ برادری آن تعلق تخوک آ کناسنگت آک بھاز مہر و مابت و خیال تخوک ءُ بندغ ئسر۔ سکھ برادری امن نا داعی ءُ۔ صدر مملکت پارے کہ پاکستان امن خواہک و او امن نا قدرو قیمت ءِ جوان چاہک۔ وزیراعظم عمران خان تینا اولیکو تران اٹی پڑوسی ملک آتون سنگتی و گچین تعلقداری کن دوتے مریفے۔ پاکستان تینٹ اسہ ہنگامہ خیز حالیت اسے آن گدرینگانے ، نن دہشت گردی نا ڈٹ کر مقابلہ ءِ کرینن و نن چانہ کہ امن اخس المی ءِ۔ صدر پارے کہ پاکستان وپاکستان نا الس بھلو است اسے نا خواجہ ءُ۔ داوخت آ ہم پاکستان کم و ود 3.5 ملین اوغان باہوٹ آتا میزبانی ءِ کننگ ءِ۔ مستین اٹی پاکستان مشکل حالیت آتیان گدرینگانے۔ دہشت گردی و انتہاپسندی نا برخلاف جنگ آن پاکستان بھاز گڑا ہیل کرینے ہنداخاطران پاکستان مدام امن نا مخ تفی ءِ کیک۔ صدر پارے کہ آخبت اٹی پاکستان و بھارت نا نیام اٹ گچین تعلقداری تیٹی سکھ برادری اہم ءُ کڑد اس ادا کیک، سکھ برادری نا بندغ آک پرامن بندغ ءُ و سکھ برادری امن نا داعی ءُ۔ صدر مملکت کرتار پور راہداری نا خصوصی وڑاٹ ذکر ءِ کرسا پارے کہ کرتار پور راہداری خیر سگالی و پرامن ہمسائیگی نا اسہ استعارہ اسے، سکھ کمیونٹی ءِ دا گام گیج آن بھاز خوشی مسنے، پاکستان غٹ ملک و مذہب آتون گچین تعلقداری تا خواہندار ءِ۔ صدر مملکت پارے کہ بابائے قوم قائد اعظم محمد علی جناح 11اگست 1947 ء نا تقریر اٹی پیدوار وڑاٹ پاریسس کہ نن غٹ پاکستانی اُن و غٹ شاری تے تینا مذہب و عقیدہ نا رداٹ تینا مسیت ، مندر ، گردوار، گرجاگھر و مذہبی جاگہ غاتیا ہِننگ نا آجوئی ءِ، پاکستان بابائے قوم انا دا کلہو ءِ اہمیت ایتک و ہنداڑا کاربند ءِ۔ صدر مملکت پارے کہ امن کن گچین تعلقداری المی ءِ، پاکستان پرامن، رکھوک و بخیر اٹ پاروک ءُ ملک اسے، اوسکھ برادری نا باسک آتے پارے کہ او تینا مذہبی ہند آتیان بیدس پاکستان نا قطبی علاقہ غاتا دورہ ءِ ہم کیر تو اوفتے اندازہ مریک کہ پاکستان اخس مہمان واز ءِ و ملک اخس رکھوک ءِ۔ اوپارے کہ سال 2013-14 ء ٹی بیرہ 15ہزار سیل و سواتی قطبی علاقہ غاتیا ہناسر وخت اس کہ داسہ 2.5ملین نا خڑک سیل و سواتی گلگت بلتستان و ایلو سیل و سواتی ہند آتیا ہِننگ ءُ۔ صدر مملکت بیساکھی میلہ ٹی بروک آ سکھ یاتری تا خیرمقدم ءِ کرے و دا اومیت نا درشانیءِ کرے کہ بروک آ سال تیٹی سکھ برادری نا ایلو باسک آک پاکستان آ برسا کیرہ و سنگتی نا رشتہ سوگو آن سوگو مرسا کیک۔
