اسلام آباد۔ 15اپریل (اے پی پی) اسپیکر قومی اسمبلی اسد قیصر پارینے کہ پاکستان و سعودی عرب اسیجا عقیدہ، دودوربیدگ ، تاریخی میرات نا امین ءُ و سعودی عرب مدام مشکل وخت اٹی پاکستان تون ہم کوپہ سلیسونے۔ اوداہیت ءِ دوشنبے نادے آ امام کعبہ شیخ عبداللہ عواد الجہنی تون اوڑدہی ٹی گپ و تران کرسا پارے۔ امام کعبہ شیخ عبداللہ عواد الجہنی پارلیمنٹ ہاؤس نا دورہ ءِ کرے ہراڑے او اسپیکر قومی اسمبلی اسد قیصر تون اوڑدہی کرے۔ اوڑدہی ٹی پاکستان و سعودی عرب نا نیام اٹ تعلقداری و مسلم امہ ءِ مون تروک ویل آتیا سرجم گپ و تران مس۔ اسپیکر قومی اسمبلی پارے کہ سعودی عرب پاکستان نا بے لوث سنگت ءِ و سعودی عرب مدام ہرمشکل وخت اٹی پاکستان تون تفینے۔ سعودی عرب پاکستان تون مشکل وخت اٹی ہم کوپہ سلیسونے و است انا حب اٹ کمک کرینے۔ اسپیکر پارے کہ پاکستانی الس سعودی عرب تون بھاز وابستگی تخک۔ اوپارے کہ پاکستان و سعودی عرب نا سنگتی بیرہ حکومت آتسکان محدود اف بلکن دا سنگتی ہڑتوم آ الس نا است آتے ٹی ءِ۔ پاکستان نا پارلیمان ہڑتوم آ ملک آتا نیام اٹ برادرانہ تعلقداری تے پین سوگو کننگ کن پرعزم ءِ۔ اسپیکر پارے کہ مسلم امہ ءِ بے شمار ویل آک مون تروک ءُ ہرافتے تون مون تننگ کن ننے اسہ ایلو نا اختلاف آتے پد پشت تخوئی مریک۔ مسلم ملک آتا نیام اٹ سیوت و خڑکی رابطہ وخت انا اہم ءُ گرج اسے۔ اسپیکر پارے کہ اسلام امن و ایلمی نا سبخ ایتک وخت اس کہ اسلام اٹی دہشت گردی و انتہاپسندی نا ہچ ءُ گنجائش اس اف۔ اوپارے کہ سعودی عرب نا ولی عہد شہزادہ محمد بن سلمان نا ساڑی آ دورہ پاکستان آن ہڑتوم آ کنڈآتا کمکاری ءِ پین مون آدننگ دوئی مسنے۔ امام کعبہ شیخ عبداللہ عواد الجہنی داوخت آ پارے کہ سعودی عرب پاکستان تون تینا تعلقداری تے بھاز اہمیت ایتک و اودے پین ودفنگ خواہک۔ اوپارے کہ مسلمان تے دہشت گردی و ایلو مون تروک ویل آتا سوب دین آن مری و اسہ ایلو تون بے اتفاقی ءِ۔ اسوہ حسنہ و اسلامی تعلیمات آتیا عمل کرسا نن دنیا وآخرت اٹی سرسہبی دوئی کننگ کینہ۔ اوپارے کہ مسلم امہ ءِ مون تروک چیلنج آتا ایسری کن سعودی عرب مدام تینا مثبت کڑد ءِ ادا کرسا کیک۔ امام کعبہ پارے کہ پاکستان و سعودی عرب نا ڈکھ و دڑد و مزل اسٹ ءِ۔ پاک سعودی عرب تعلقداری امن، شونداری و شونہالی نا نشان ءِ۔ اومستی پارے کہ دہشت گردی و انتہاپسندی نا چٹفنگ کن مسلم ملک آتے اواری اٹ کاریم کروئی مریک۔
