اسلام آباد۔ 15اپریل (اے پی پی) بنجائی وزیر اطلاعات ونشریات چوہدری فواد حسین پارینے کہ ہچ ءُ وزیر اسے بدل کپننگ انگ ءِ، وزیراعظم عمران خان کلہو اس گدریفینے کہ وزیر آتا بدلی نا بابت میڈیا غا غلط ءُ خبر اس چلینگ انگ ءِ داوڑنا خبر آتے پک کننگ آن بیدس بایدے چلیفنگپ ، غلط خبر آتیان ملک ءِ نسخان رسینگک داٹی میڈیا نا ہم نسخان ءِ ، وزیر داخاطران وزیر ءِ انتئے کہ وزیراعظم عمران خان اوفتیان است جم ءِ ، آئی ایم ایف تون مذاکرات آ اسد عمر سرجم آتیان معلومدار کیک، نن سوگو ءُ معیشت اسے نا کنڈا ہِننگ اُن ۔ دوشنبے نادے آ داڑے اسلام آباد اٹی میڈیا تون گپ و تران کرسا وزیر اطلاعات و نشریات پارے کہ ہراتم کہ آئی ایم ایف تون ہیت حتمی مرحلہ غاتے ٹی مریک داوڑنا خبرآک بریرہ۔ چوہدری فواد حسین پارے کہ وزیر خزانہ آئی ایم ایف تون مذاکرات کرسا بننگ ءِ، بروک آ 2دے تیٹی معیشت نا بابت بھلو خبر اس بننگ والاءِ۔ اوپارے کہ وزیرآتا کارکڑدگی رپورٹ وزیراعظم آفس آ سرمسنے، وزیر داخاطران وزیر ءِ انتئے کہ وزیراعظم عمران خان اوفتیان است جم ءِ ۔ بنجائی وزیر اطلاعات ونشریات پارے کہ ہروڑنا ردوبدل نا اختیار وزیراعظم تون ارے، دُن انگا ہرفیصلہ نا بابت معلومدار کننگک۔ اوپارے کہ آئی ایم ایف تون مذاکرات آ اسد عمر سرجمی اٹ معلومدار کیک۔ انشاء اللہ نن سوگو ءُ معیشت اسے نا کنڈا ہِننگ اُن۔ چوہدری فواد حسین پارے کہ ایف اے ٹی ایف نا معاملہ ٹی ہم مثبت پیش رفت مون آ بننگ ءِ۔ داکان مست بنجائی وزیر اطلاعات ونشریات چوہدری فواد حسین دارداٹ اسہ ٹویٹ اس ہم جاری کرینے ہراٹی او پارینے کہ حکومتی وزیر آتا قلمدان ءِ بدل کننگ نا بابت خبر آتے ٹی ہچ ءُ راستکی اس اف ، وزیر آتا بدلی وزیراعظم نا صوابدیدی اختیار ءِ، میڈیا دارداٹ زمواری نا درشانی ءِ کے۔ ٹویٹ اٹی وزیر اطلاعات ونشریات و مستی پارے کہ داوخت آ پاکستان اہم ءُ مرحلہ سے آن گدرینگ انگ ءِ و داوڑنا قیاس آرائی تیان ہیجان ودی مریک، ہرا ملک انا فائدہ ٹی اف۔
