ٹیکنالوجی تعلیم نا آب ءِ گچین کننگ اٹ اہم ءُ کڑد اس ادا کرے، بنجائی وزیر تعلیم و کسبی تربیت شفت محمود

اسلام آباد۔ 15اپریل (اے پی پی) بنجائی وزیر تعلیم و کسبی تربیت شفقت محمود پارینے کہ ٹیکنالوجی تعلیم نا آب ءِ گچین کننگ اٹ اہم ءُ کڑد اس ادا کرینے، تعلیم بالغاں نا پروگرام ءِ سرسہب کننگ اٹ ہم انفارمیشن ٹیکنالوجی آن کاریم ہلنگک ہرانا جوان ءُ بھرم اس مرتب مریک ۔ دوشنبے نادے آ او جاز سمارٹ اسکول نا دود آن تران کریکہ۔ بنجائی وزیر پارے کہ دا پروگرام نا رداٹ 75اسکول آتے اوار کننگاسس دا اسکول آتے ٹی خوانوک آ چناتے پوسکن آ انفارمیشن ٹیکنالوجی پروگرام نا کمک اٹ چندی سرحال آتا آب اٹو تعلیم تننگا۔ اوپارے کہ دانا نتیجہ غاک است بڈ ءُ و ننا است خواہی ءِ کہ داوڑنا پین ادارہ غاک مون آ بریر و تعلیم اٹی تینا بشخ ءِ شاغر۔ اواومیت ظاہر کرے کہ دا پروگرام آخبت اٹ برجاسلک۔ شفقت محمود پارے کہ دا پروگرام نا جوان انگا گڑ ا گوازی ہی گوازی ٹی چناتے تعلیم تننگ ئس ہرابے کچ موثر ثابت مس، اوپارے کہ ٹیکنالوجی و تعلیم نا آخبت روشناءِ ننا بدبختی ءِ کہ داسکان ننا خواندگی نا کچ 58 درسد ءِ ۔ ملک انا ترند رفتار شونداری کن المی ءِ کہ خواندگی نا کچ اٹی ودکی کننگے داڑکن تعلیم بالغاں نا پروگرام اس بناکننگانے۔ اوپارے کہ دا پروگرام تا فائدہ غاتے ٹی ودکی و اوفتے سرسہب کننگ کن انفارمیشن ٹیکنالوجی آن فائدہ ہرفنگک۔ اوپارے کہ انفارمیشن ٹیکنالوجی نا کاریم اٹ اتنگ آن بڑزکو تعلیم نا بشخ اٹی ہم گچین ءُ نتیجہ اس مون آ بسنے و پٹ وپول اٹی کمک رسینگانے۔ جاز سمارٹ اسکول پروگرام 2017 ء ٹی بناکریسس۔ ویون نا چیئرمین و سی ای او ارسولابونز ئسک داوخت آ پاریر کہ پروگرام نا دوئی کروک آ بھرم تیان ثابت مس کہ جاز و بنجائی نظامت تعلیمات ورناتے انفارمیشن ٹیکنالوجی فراوان کننگ کن پرعزم ءِ۔ ورناتا آخبت آئی ٹی ٹی ءِ و کنے دا ہیت انا بے کچ خوشی ءِ کہ جاز سمارٹ اسکول اٹی طالب علم آتے سلیکون ویلی نا طالب علم آتا وڑاٹ تعلیم تننگک۔ اوپارے کہ دا پروگرام ءِ مچ آ ملک اٹی مون آ دننگک۔ داوخت آ طالب علم آتے ٹی ٹیبلٹ ہم بشخ وپانٹ کننگا۔