اسلام آباد۔ 15اپریل (اے پی پی) چیئرمین سینیٹ محمد صادق سنجرانی پارینے کہ پاکستان سعودی عرب تون تعلقداری تے قدر انا نظر اٹ ہرک، پاکستان و سعودی عرب تاریخی، دودوربیدگی ، مذہبی رشتہ غاتے ٹی گنڈوک ءُ، مشکل وخت اٹی سلنگ آ سعودی عرب نا منت وار اُن۔ داخیال آتا درشانی ءِ او دوشنبے نادے آ پارلیمنٹ ہاؤس اٹی امام کعبہ ڈاکٹر عواد الجہانی تون اوڑدہی ٹی گپ و تران کرسا کرے۔ اوڑدہی ٹی قائد ایوان سینیٹ شبلی فراز، قائد حزب اختلاف راجہ ظفر الحق ، اعظم سواتی، سجاد طوری ، مولابخش چانڈیو و دلاور خان ئسک ساڑی ئسر۔ داوخت آ چیئرمین سینیٹ محمد صادق سنجرانی پارے کہ ڈیہہ و جہانی معاملہ غاتیا اسہ وڑنا نقطہ نظر ہڑتوم آ کنڈآتا تعلقداری تے پین سوگو کیک۔ سعودی ولی عہد نا ساڑی آ دورہ غا تین پہ تینی نا اسہ پوسکن ءُ باب اس ملانے۔ اوپارے کہ اِراہزار آن زیات بندی تا یلہ کننگ آ منت وار اُن۔ حاجی تا کوٹہ ٹی ودکی ستاکڑزک۔ سعودی زرکاری آن پاکستان اٹی شونداری و شونہالی نا پوسکن ءُ دور اس بناکیک۔ چیئرمین سینیٹ پارے کہ پاکستان و سعودی عرب نا نیام اٹ واپاری عدم توازن ءِ چٹفنگ نا گرج ءِ۔ امام کعبہ نا دورہ بے کچ اہم ءِ۔ پیغام اسلام کانفرنس دنیا ءِ امن نا کلہو اس تس۔ دہشت گردی ءِ اسلام تون گنڈنگ اسہ سجفوک ءُ چم اسے۔ چیئرمین سینیٹ محمد صادق سنجرانی پارے کہ اسلام امن، اخوت، سگ انا تعلیم ایتک۔ چیئرمین سینیٹ امام کعبہ ءِ ایوان بالا نا کاریم کننگ نا وڑوڈول آتیان معلومدار کرے۔ اوپارے کہ شریعت و اسلامی معاملہ غاتا بابت کانود سازی ٹی اسلامی نظریاتی کونسل تون سلابت کننگک۔ ساڑی آ پاک بھارت بے چیٹی ٹی سعودی ولی عہد نا کڑد ستاکڑزنگ نا قابل ءِ۔ داوخت آ شبلی فراز پارے کہ امام کعبہ نا پاکستان آ بننگ ملک و قوم اکن برکت و خوشی اسے نا سوبءِ۔ کعبہ تون نسبت نا مقابلہ ٹی ڈغاری عہدہ غاتا اہمیت اف۔ اوپارے کہ پاکستان و سعودی عرب نا رشتہ ہرمشکل وخت آ پین سوگو مسنو۔ راجہ ظفرالحق پارے کہ سعودی عرب تون عقیدت ننا تعلقداری تا سوگوی نا سوب ءِ۔ پین ملک اس سعودی عرب نا بریبر مننگ کپک۔ اوڑدہی ٹی امام کعبہ شیخ عبداللہ عواد الجہانی پارے کہ پاکستان اسلامی دنیا نا بھاز بھلو واک اسے۔ پاکستان و سعودی عرب نا سلامتی اسہ ایلو تون گنڈوک ءِ۔ امام کعبہ پارے کہ نن اسہ ایلو آن جتا مرسا رہینگ انگ کپنہ۔ پاکستان نا اہمیت و پاکستانی تا مہر و مابت نا رداٹ داجاگہ نا الس تون ملنگ ننے آ واجب ءِ۔ اوپارے کہ سعودی ولی عہد نا دورہ داہیت انا نشانی ءِ کہ نن پاکستان ءِ اخس اہمیت ایتنہ۔ سعودی عرب و پاکستان امت مسلمہ نا ویل آتا ایسری کن اسیجا جہد کننگ اُن۔ امام کعبہ پارے کہ پاکستان و سعودی عرب عالم اسلام نا ہمو اسیجا واک آک ءُ ہرا ہر چم انا مقابلہ ءِ کننگ نا لائخی تخرہ۔
