ڈپٹی چیئرمین سینیٹ نا کماشی ٹی سینیٹ نا چار باسکی ڈل چین نا پنچ دے ئی دورہ غا بیجنگ آ سرمس
بیجنگ۔ 15اپریل (اے پی پی) ڈپٹی چیئرمین سینیٹ سلیم مانڈوی والا نا کماشی ٹی سینیٹ نا چارباسکی ڈل چین نا پنچ دے ئی دورہ غا بیجنگ آ سرمسنے۔ پارلیمانی ڈل اٹی سینیٹر جنرل (ر) عبدالقیوم ، سینیٹر سسی پلیجو و سینیٹر لیاقت علی خان ترکئی اوار و۔ دورہ ٹی سینیٹر سلیم مانڈوی والا شنگھائی ٹی بیلٹ اینڈ روڈ انا سالانہ رپورٹ نا بنائی دود آن تران کیک۔ سلیم مانڈوی والا سینیٹ ڈل انا شرف اٹی چین اٹی پاکستانی سفیر خالد مسعود اِرغ اس تس پارلیمانی ڈل چیئرمین کمیونسٹ پارٹی چائنہ وانگ یانگ تون اوڑدہی کرینے۔ داوخت آ چیئرمین کمیونسٹ پارٹی چائنہ پاکستان نا دورہ نا سلہ ءِ امنا کرینے۔ ڈپٹی چیئرمین سینیٹ سلیم مانڈوی والاپارے کہ پاکستان نا سیاسی سرکڑدہ غاک پاک چائنا اکنامک کوریڈور آ یکجاءُ۔ پاکستان چینی صدر شی نا بیلٹ اینڈ روڈ ڈٹ انا پورو مخ تفی ءِ کیک دا ڈٹ تین پہ تینی شونداری وشونہالی نا ضمانت ءِ ۔ داڈٹ اٹی بے پناہ معاشی و سفارتی لائخی ارے دا ڈٹ کروڑ آ خلقت نا زند ءِ بدلیفنگ کیک۔ سینیٹر سلیم مانڈوی والا پارینے کہ 2015آن آر ڈی آئی چائنہ پاکستان اکنامک کوریڈوکن سفت نا قابل پالیسی ریسرچ اس فراوان کرینے ہراڑان ہڑتوم آ کنڈآتا کمکاری ءِ سوگو کننگ اٹ کمک رسینگانے۔ سینیٹر سلیم مانڈوی والا پارے کہ بیلٹ اینڈ روڈ انا سالانہ شونداری رپورٹ تین پہ تینی کمکاری نا پوسکن آ ماڈل ءِ پہہ مننگ اٹ کمک ایتک۔ بیلٹ اینڈ روڈ ماڈل علاقائی رابطہ و جہانی شونداری نا ورلڈ ریکارڈ جوڑ کرینے۔ اوپارے کہ بدلینگوک آ جہانی حالیت آتا رداٹ بیلٹ اینڈ روڈ ڈٹ دنیا ءِ گلوبل گورننس نا چینی ماڈل اس پیش کرینے۔
