اسلام آباد ءِ سگریٹ کشنگ آن پاک علاقہ اس کننگ کن غٹ ممکن کوشست آتے کننگ اُن، بنجائی وزیر نیشنل ہیلتھ سروسز، ریگولیشن اینڈ کوآرڈینیشن عامرمحمود کیانی نا دود آن تران

اسلام آباد۔ 15اپریل (اے پی پی) بنجائی وزیر نیشنل ہیلتھ سروسز، ریگولیشن اینڈ کوآرڈینیشن عامر محمود کیانی پارینے کہ حکومت و وزارت قومی جان جوڑی اسلام آباد ءِ سگریٹ کشنگ آن پاک علاقہ اس کننگ نا غٹ ممکن کوشست آتے کننگ ءُ ہراکہ الس کن جان جوڑ چاگڑد و حسن انا لحاظ اٹ دنیا نا زیبا انگا دارالحکومت ءِ۔ اوداہیت ءِ پاکستان مانومنٹ و لوک ورثہ ءِ ٹوبیکو سموک فری زون اس کننگ نا بارواٹ دود آن تران کرسا پارے۔ بنجائی وزیر پارے کہ پبلک ہند، ہیلتھ کیئر ادارہ تعلیمی ادارہ و پبلک ٹرانسپورٹ اٹی سگریٹ نوشی مفننگ ءِ المی کننگ ننا غٹ انا اجتماعی زمواری ءِ تانکہ دا ہند آتیا الس ءِ جان جوڑ و سگریٹ نوشی آن پاک چاگڑد اس تننگ مرے و او سگریٹ نوشی نا مول تیان زہمی مفس و ننا بروک آ چین ءِ سگریٹ نوشی نا خراب انگا زہم آتیان نجات ملے۔ بنجائی وزیر قومی جان جوڑی سروسز پارے کہ اینو اسلام آباد اٹی 214پبلک ہندآک سموک فری ءُ۔ ہنداوڑ حکومت الس ءِ مہلک مرض آتیان بچفنگ کن گام گیج آتا بناءِ کرینے۔ انتئے کہ پاکستان دنیا نا ہمو 15ملک آتے ٹی اوار ءِ ہراڑے سگریٹ نوشی نا سوب جان جوڑی ءِ ملوک آ نسخان تا معیشت آ بھلو بھاریم اسے۔ وخت اس کہ 2014ء نا ٹوبیکو سروے نا رداٹ ورناتے ٹی تمباکو نا کاریم اٹ اتنگ نا کچ 10.7درسد ءِ۔ اوپارے کہ حکومت پاکستانی خاص کر ورناتا جان جوڑی ءِ المی کننگ نا پکا عزم ءِ کرینے و وزارت قومی جان جوڑی سروسز سگریٹ نا طلب و اوٹی کمتی کن گام گیج کرینے و کل انا مون آ سگریٹ آتا بہاکننگ آ پابندی ، سگریٹ نا ڈبہ غا مضر اثرات بارواٹی انتباہ نا سائز ءِ 50 آن ودفسا 60 درسد کننگ و شیشہ نا درآمد آ پابندی کون آ گام گیج آتے کننگانے۔ بنجائی وزیر تینا تران اٹی سگریٹ نوشی نا چٹفنگ نا بارواٹ گام گیج آتا مانیٹرنگ و عملدرآمد ضلعی کمیٹی نا باسک و غٹ شریدار آتاہم ستاءِ کرے ہرافک ٹیکنیکل راہشونی، افرادی واک انا فراوانی یا کانود نا نافذ کننگ کن کمک کریر۔