کوئٹہ۔ 15اپریل (اے پی پی) وزیر مملکت داخلہ شہریار آفریدی پارینے کہ دہشت گردی ٹی اوار عنصر آتے اوفتے اوفتا کروک نا سزا تننگ کن ہرحد اسکان کانہ، بلوچستان نا محرومی تا چٹفنگ وزیراعظم عمران خان نا ویژن ءِ، فوجی عدالت آتیان بھاز انگا خلقت ءِ سزا ملانے و بے پرخ مچ آ ملک اٹی الس دشمن عنصر آتا برخلاف کریک ڈاؤن کننگانے، ہزارہ برادری ننا نیت آ شک کپس، انتئے کہ کوئٹہ دھماکہ نا زموار بندغ آک چائے اخس کہ طاقت ور مریر اوفتا کانود نا گرفت اٹ اتسا سزا ترفینہ، دشمن قوت آتے کلہو ایتنہ کہ او تینا سیوت و یکجہتی نا طاقت اٹ غٹ چم آتے بے سہب کینہ، پاکستانی قوم یات کے کہ آزمائش آک اللہ تعالیٰ نا محبوب خلقت آ بریرہ،حکومت ہر مشکل ساہت اٹی نما ہم کوپہ سلوک ءِ، ہزارگنجی واقعہ ملک اٹی انتشار تالان کننگ نا کوشست اسے۔ پاکستان نا دشمنک خوارہ کہ وڑانا وڑاسے ٹی پاکستان ءِ بلیک لسٹ اٹ اتنگے ہنداخاطران ننے ہچ کس نا اشارہ غاتیا چلینگوئی اف، ہزارہ برادری ننا شرف، پہچان و بنداوءُ، داخیال آتا درشانی ءِ او دوشنبے نادے آ وزیراعظم نا خصوصی کمکار اوورسیز پاکستانیز سید ذوالفقار عباس بخاری و صوبائی وزیر آتون اوار کوئٹہ بمب دھماکہ ٹی شہید مروک آ بندغ آتا خاہوت تون ہڑزخواہی و فاتحہ خوانی کننگ آن پد میڈیا تون گپ و تران کرسا کرے۔ وزیر مملکت داخلہ شہریار آفریدی پارے کہ وزیراعظم عمران نا کنڈآن ہزارگنجی دھماکہ ٹی نہادی انسانی جان تا وارث آتون ہمدردی نا درشانی کن کوئٹہ غا بسونٹ ہزارہ برادری ننا عزت پہچان و بنداوءُ، پشتون ، بلوچ و سول لس فورسز ہرانا ورناک ہزارگنجی واقعہ ٹی شہید مسنو نن او غٹ انا غم اٹی نئے بیرہ بریبر نا شریک اُن بلکن ہر مشکل آزمائش و خوشی ٹی نن نما ہم کوپہ سلوک اُن، اوپارے کہ پاکستان نا دشمنک خوارہ کہ وڑانا وڑاسے ٹی وطن عزیز ءِ بلیک لسٹ اٹ اتنگے ، دہشت گردی نا برخلاف سیکورٹی فورس و شاریک لازوال قربانی تسنو کنا اُراغان مسہ میت پیش تمانو، فلسفہ حسینؓ ءِ کہ ظالم نا برخلاف سلسا مظلوم تون تفوئی ءِ شہیدی ہر مسلمان نا دتراٹی ءِ۔ شہریار آفریدی پارے کہ غیر تا ایجنڈا غا زبان قومیت، مسلک و علاقائی بنداو تیا الس اٹی پرخ ودی کننگانے ولے نن اللہ تعالیٰ نا تائید و نصرت اٹ یکجہتی و سیوت و سخا اٹ پاکستان نا سالمیت آ آنچ اس ہم بننگ کن ہلیپنہ، اوپارے کہ بنجائی حکومت، صوبائی حکومت سیکورٹی فورس و غٹ اسٹیک ہولڈر آک ہزارہ الس ءِ رکھ فراوان کیرہ ، وزیراعظم عمران خان نا ویژن ءِ کہ بلوچستان و گلگت بلتستان نا محرومی تے چٹفوئی ءِ نن غم انا ساہت اٹی نم تون سلوک اُن و زبانی پڑوآتے کپنہ انتئے کہ کوئٹہ ٹی بحالی امن و الس نا جان و مال انا رکھ اکن غٹ اسٹیک ہولڈرآک اسہ پنہ غاٹو۔ وزیر مملکت داخلہ شہریار آفریدی پارے کہ پاکستانی قوم اکن کلہو اسے کہ آزمائش آک قوم تیا بریرہ کارہ و خاصا فلسفہ حسینؓ آل محمد ﷺ ءِ کے ننے کاٹم ءِ شیف کننگ و خلیس نا جاگہ غا اوفتا مقابلہ ءِ کروئی ءِ و مچ آ قوم مقابلہ ءِ کننگ ءِ ہنداخاطران نم ننا نیت آ وخت اس ہم شک انا درشانی ءِ کپبو، حکومت ہر مشکل ساہت اٹی نما ہم کوپہ سلوک ءِ ہزارگنجی واقعہ ملک اٹی انتشار تالان کننگ نا کوشست اسے ، پاکستان نا دشمنک خوارہ کہ وڑانا وڑاسے ٹی پاکستان ءِ بلیک لسٹ اٹ اتنگے ، پاکستان نا فوج و الس دہشت گردی نا چٹفنگ کن لازوال قربانی تننگ ءُ و شہید آتا بے مثل قربانی تا سوب بلوچستان وپاکستان ءِ امن نا وت اس کینہ۔
