ملتان۔ 24 جنوری (اے پی پی) مزن وزیر محمد نواز شریف ئَ گوشت کہ سرجمیں پاکستان ئَ دیمروئی بوھگ ئَ اِنت، ھرکس ئَ کہ دیمروئی ئِ سنچ نیست آ دیمروئی ئِ کشک ئَ ڈنگر جنگ ئِ جہس ئَ اِنت، حکومت ئُُ سیاستدان آنی کار اُلس ئَ را جاک ئُُ کوکار، کنگ ئِ نیمگ ئَ تیلانک دیگ نہ اِنت، بلکینگ ئَ آئی کار اُلس ئَ ساکم کنگ اِنت، ٹوھیں لُنکا ئِ وروک نوں بگش اَنت کہ نوکیں پاکستان کُج اِنت، ٹی وی ئِ دیم ئَ آیگ ئُُ بے سر ئُُ بے پادیں گپ ئِ کنوک آناں یک روچ ئِ اُلس ئِ دیم ئَ پدر بوھگی اِنت۔ اے ھیالانی درشانی آئی ئَ سئے شمبے ئِ روچ ئَ اِدا ملتان میٹرو بس سروس ئِ بُنگیجی مراگش ئِ دیم ئَ تران کنان ئَ گوشت۔ اے موہ ئَ گورنر پنجاب رفیق رجوانہ، سر وزیر پنجاپ شہباز شریف، بُنجاھی وزیر ئُُ کلانئیں سیاست دان ساڑی اَتنت۔ یات دارگ بہ بیت کہ راولپنڈی اسلام آباد ئُُ لاہور ئَ پد ملتان سیمی شہر اِنت کہ آھودا 28ارب کلدار ئِ ھرچ ئُُ درچ ئَ 18کلومیٹر میٹرو بس سروس منصوبگ سرجم کتگ، مزن وزیر محمد نواز شریف ئَ بھر زرتگیں مردم آنی دیم ئَ تران کنان ئَ گوشت کہ مرچی ما ایوک ئَ سیاسی جاک ئُُ دیمروئی ئِ کار آنی دیم ئَ کنٹگ جنگ ئَ وھد ئُُ پاس ئِ رائیگان کنگ ، یا ناشرکاری ئِ ھاترا ناں بلکینگ ئَ ملتان ئِ اُلس ئَ ئَ یک براھداریں ٹیکی یے دیگ ئَ اتکگ آں۔ ملتان ئِ اُلس ئِ اِزمت ئُُ وتی پرز ئِ پیلو کنگ ئَ اتکگ آں۔ ھرچی کہ شمے ھک اِنت ما آئی دیگ ئَ اتکگ آں۔ آئی ئَ گوشت کہ کم چہ کم وھد ئُُ پاس ئَ میٹرو منصوبگ ئِ سرجمی ئِ سر ئَ سر وزیر پنجاپ شہباز شریف ئُُ ملتان ئِ اُلس ئَ را مبارکی دات ئُُ اُمیت سہرا کُت کہ پشمندگیں بھر آنی جوڑیشت ئِ کار زوت بندات بیت، اگاں اے بھر استیں دور ئِ حکومت ئَ سرجم بہ بیت گڈا سک باز شر اِنت۔
