وزیراعلیٰ بلوچستان جام کمال خان نا کماشی ٹی امن و ایمنی نا حالیت آتا جاچ ءِ ہلنگ کن بڑزکو کہولی دیوان اس ، دیوان اٹی دہشت گرد و اوفتا سرکڑدہ غاتا برخلاف برجا کارروائی تے پین گچین کننگ و دیر پا و آخبتی بنداو تیا امن ءِ ہر حال اٹ المی کننگ نا فیصلہ ءِ کرسا پولیس و ایلو سیکورٹی ادارہ غاتے پیدوار پارت

کوئٹہ۔ 12اپریل (اے پی پی) وزیراعلیٰ بلوچستان جام کمال خان نا کماشی ٹی ہزارگنجی نا دہشت گردی نا واقعہ نا رداٹ امن و ایمنی نا حالیت آتا جاچ ءِ ہلنگ کن اڈ ہلوک آ بڑزکو کہولی دیوان اٹی دہشت گرد و اوفتا سرکڑدہ غاتا برخلاف برجا کارروائی تے پین گچین کننگ و دیر پا و آخبتی بنداو تیا امن ءِ ہر حال اٹ المی کننگ نا فیصلہ ءِ کرسا پولیس و ایلو سیکورٹی ادارہ غاتے پیدوار پارت کننگانے۔ دیوان اٹی کوئٹہ شار انا سیکورٹی پلان نا ہم سرجم جاچ ءِ ہلسا اودے پین گچین کننگ آ امنا کننگانے، صوبائی وزیر آک میر ضیاء اللہ لانگو، میر نصیب اللہ مری ، سردار عبدالرحمان کھیتران، میر محمد خان لہڑی، عبدالخالق ہزارہ ، باسک صوبائی اسمبلی اصغر خان اچکزئی، چیف سیکرٹری بلوچستان ڈاکٹر اختر نذیر ، ایڈیشنل آئی جی پولیس، ڈی آئی جی کوئٹہ و ڈپٹی کمشنر کوئٹہ دیوان اٹی بشخ ہلکر۔ ڈی آئی جی کوئٹہ دیوان ءِ دہشت گردی نا واقعہ غا حوال تس وخت اس کہ او دہشت گرد آتا برخلاف جاری کارروائی و داوخت اسکان دوئی مروک آ سرسہبی تیان ہم معلومدار کرے، دیوان اٹی دا ہیت آ امنا کننگاکہ ملک و صوبہ ٹی امن و ایمنی نا گچینی قومی عزم، سیکورٹی فورسز و الس نا قربانی تا سوب ممکن مسنے و دا حالیت آتے خراب کننگ نا اسہ چم اسے ہم سرسہب مننگ کن ہلنگ پننگک۔ دیوان اٹی سوزی مارکیٹ ہزارگنجی و ایلو اہم السی ہند آتیا ہلہلئی بنداو تیا سی سی ٹی وی کیمرہ غاتا خلنگ تون اوار امن ءِ برجاتخنگ کن گڑاس پین فیصلہ ہم کننگا، دیوان اٹی شہید آتا خاہوت آتے حکومتی پالیسی نا رداٹ مالی کمک نا دمدستی فراوانی و ٹھپی تا درمان حکومتی خڑچ آتیا کرفنگ نا فیصلہ ءِ کرسا محکمہ جان جوڑی و محکمہ خزانہ ءِ دا بابت گام گیج کننگ نا پارت کننگا۔ دیوان اٹی دا عزم انا درشانی ءِ کننگاکہ اسہ ہم برادر قوم و قبیلہ سے نا نیام اٹ مذہب و فرقہ نا بنداو آ پرخ ودی کننگ نا موکل تفننگک و الس نا کمک و مخ تفی آن مذہبی ہم آہنگی، ایلمی و قومی یکجہتی ءِ ہر حال اٹ برقرار تخنگک۔