اسلام آباد۔ 12اپریل (اے پی پی) وزیر نیشنل ہیلتھ سروسز ریگولیشن اینڈ کوآرڈنیشن عامر محمود کیانی نا پارت آ دوائی تا نہاد آتے ٹی غیر کانودی ودکی کروک آ دوائی جوڑ کروک آ کمپنی تا برخلاف مچ آ ملک اٹی کریک ڈاؤن ترندی اٹ برجاءِ، دا چرجوئی ٹی ڈرگ ریگولیٹری اتھارٹی نا سروک و فیڈرل ڈرگ انسپکٹر تون اوار چندی ڈسٹری بیوشن آتیا اناگت چھاپہ خلسا دوائی تا زیات نہاد ہلوک آ اسٹاک آتے کوزہ ٹی ہلنگ ءُ۔ وزارت جان جوڑی نا ذرائع نا رداٹ وزیر جان جوڑی عامر محمود کیانی نا پارت آ دوائی تا نہاد آتے ٹی غیر کانودی ودکی کروک آ دوائی جوڑ کروک آ کمپنی تا برخلاف مچ آ ملک اٹی کریک ڈاؤن ترندی اٹ برجاءِ ہرانا تسلسل اٹی ڈریپ نا ٹیم مچ آ ملک انا چندی شار راولپنڈی، لاہور، ملتان، فیصل آباد، کراچی، حیدر آباد وپشاور اٹی بھلو کچ اسے آ ایکشن ہلنگ ءِ وخت اس کہ غیر کانودی وڑاٹ زیات نہاد والا دوائی تے کوزہ ٹی ہلنگ انگ ءِ۔ اوپارے کہ غیر کانودی ودکی ٹی اوار کمپنی تا برخلاف سخت کارروائی مریک حکومت دوائی تا نہاد آتے ٹی غیر کانودی ودکی نا ہچ ءُ حال اسے ٹی موکل تفک۔ اوپارے کہ ہرا 395دوائی تا نہاد اٹی حکومت کمتی نا نوٹیفکیشن اس جاری کریسس ہمو دوائی تا نہاد آتے دمدستی کم کننگے، دوائی تے منظور مروک آ نہاد آ بہاکپروک آ کمپنی تا برخلاف سخت ایکشن مریک۔
